जळगाव प्रतिनिधी | जळगाव शहरातून एक धक्कादायक घटना समोर आली आहे. शहरातील पिंप्राळा भागात राहणाऱ्या १७ वर्षीय अल्पवयीन मुलाने मोबाइलमध्ये चित्रीकरण करून घरात गळफास घेऊन आत्महत्या केल्याची धक्कादायक घटना शुक्रवारी घडलीय. घनश्याम संजय भोई (वय १७, सेंट्रल बँक कॉलनी, पिंप्राळा) असे मृत अल्पवयीन मुलाचे नाव आहे. आत्महत्येचे चित्रीकरण केलेला मोबाइल रामानंदनगर पोलिसांनी ताब्यात घेतला आहे.
घनश्याम संजय भोई हा आई, वडील, बहीण यांच्यासह सेट्रल बँक कॉलनी येथे राहत होता. सर्व जण नेरी येथे गेलेले असताना सायं. ७ वाजेनंतर त्याने गळफास लावून आत्महत्या केली. शेजारी महिलेच्या हा प्रकार निदर्शनास आल्याने ही घटना उघड झाली.
दरम्यान, शेजारच्यांनी रामानंद नगर पोलीसांना घटनेची माहिती दिली असून मृतदेह जिल्हा शासकीय वैद्यकीय महाविद्यालयात हलविण्यात आला आहे. दरम्यान अल्पवयीन मुलाने गळफास का घेतली यांची कारण अद्याप स्पष्ट झालेले नाही. रात्री उशिरा रामानंदनगर पोलिस ठाण्यात अकस्मात मृत्यूची नोंद करण्याचे काम सुरू होते.
दरम्यान, गळफास घेण्याआधी घनश्याम याने समोर स्टँडला स्मार्टफोन लाऊन यातील कॅमेरा ऑन केला होता. यामुळे यात त्याच्या आत्महत्येची घटना रेकॉर्ड झाल्याचे पोलिसांना तपासणीत आढळून आले आहे. त्याने आत्मघाताचे पाऊल नेमके कशासाठी उचलले ? आत्मघात करत असतांना त्याने याचे रेकॉर्डींग का केले ? याची माहिती मात्र पोलिसांना मिळालेली नाही.
