धुळे : नात्याला काळिमा फासणारी धक्कादायक घटना समोर आलीय. सेवानिवृत्त प्राचार्य सासऱ्याने आपल्या मुलीसारख्या सुनेवर बलात्कार केल्याचा धक्कादायक प्रकार समोर आला आहे. याप्रकरणी सासरा, पती आणि सासूवर धुळे देवपूर पोलिसांनी गुन्हा दाखल करून त्यांना अटक केली आहे.
कॉम्प्युटर इंजिनिअर अमरावती येथील एका महाविद्यालयातून सेवानिवृत्त प्राचार्यांच्या कॉम्प्युटर इंजिनिअर असलेल्या २६ वर्षीय मुलाचा धुळे येथील तरुणीसोबत २४ डिसेंबर २०२० रोजी विवाह झाला होता. विवाहानंतर संबंधित पिडीत तरूणी अमरावती येथे गेली. मात्र, काही महिन्यानंतरच सासऱ्याने सुनेला ब्लॅकमेल करून तिचा छळ केला. सासऱ्याने सुनेवर खोटे आरोप करून मुलाला घटस्फोट देण्यास भाग पाडण्याची धमकी देखील दिली. तसेच सुनेकडून पुण्यात फ्लॅट घेण्यासाठी ४० लाख रुपयांची मागणी करत सुनेच्या माहेरी सासरच्यांनी हजेरी लावली. तसेच तिच्या चारित्र्यावर आरोप करत विवाहितेवर वारंवार अत्याचार केला.
पिडीतेने सासरा बलात्कार करत असल्याचा व्हिडीओ आपल्या मोबाईलमध्ये कैद केला. हा व्हिडीओ विवाहितेने सासू आणि पतीला दाखवल्यानंतरही त्यांनी तिच्यावर विश्वास ठेवला नाही. करोना कालावधीत निरंतर अत्याचार सहन केल्यानंतर कोरोनाचे निर्बंध हटविले गेल्यानंतर विवाहितेने तिच्या मामाला घडलेला हा प्रकार सांगितला. यानंतर मामाच्या मदतीने वडिलांकडून विवाहितेने धुळ्यातील देवपूर पोलिस ठाण्यात तक्रार दाखल केली. त्यानुसार सासऱ्यासह सासू आणि पती या तिघांना पुणे येथून ताब्यात घेण्यात आले असून, त्यांच्या विरोधात गुन्हा दाखल करण्यात आला आहे.
