धुळे: अनैतिक संबंधात आड येणाऱ्या महिलेच्या पतीचा पाय अॅल्युमिनियमच्या तारेनं घट्ट बांधून मृतदेह विहिरीत फेकल्याची घटना शिंदखेडा तालुक्यातील सोंडले शिवारात घडली असून या घटनेने खळबळ उडाली आहे. याप्रकरणी पोलिसांनी मृत व्यक्तीच्या पत्नीला आणि तिच्या प्रियकराला अटक केली आहे. दोघांनीही आपल्या गुन्ह्याची कबुली दिली आहे.
सोनगीर येथील निंबा रूपला पाटील (वय ४०, रा. इंदिरानगर) यांचा शेजारी राहणाऱ्या शरद शालिग्राम पाटील (वय ४१) याने खून केला आहे. पोलिसांनी त्याला ताब्यात घेतले आहे. मृत निंबा पाटील यांची पत्नी अनिताशी शरद शालिग्राम पाटील याचे काही दिवसांपासून अनैतिक संबंध होते. त्या दोघांना सोबत संसार करायचा होता. मात्र यात तिचा पती निंबा हा अडथळा होत असल्याने शरद पाटील याने निंबा पाटील यांचा काटा काढण्याचे ठरवले. त्यात निंबा गेल्या २१ तारखेपासून बेपत्ता होता. त्याचा शोध घेतला असता त्याचा मृतदेह शिंदखेडा तालुक्यातील सोंडले परिसरातील एका शेतातील विहिरीत सापडला. गेल्या दहा दिवसांपासून पाण्यात हा मृतदेह असल्याने तो पूर्णपणे कुजला होता. या प्रकरणातील आरोपी शरद पाटील याला पोलिसांनी ताब्यात घेतले. त्याच्या पत्नीचे निधन झाले असून, मृत निंबा पाटील यास तीन मुली आहे. नवरा पाटील हे चारित्र्याच्या संशयावरून मारहाण करीत असल्याबाबत ४ अॉक्टोबरला पत्नीने तक्रार केली होती.
असा केला खून
निंबा पाटील यास दारूचे व्यसन होते. शरद पाटील याची त्यांच्याशी मैत्री होती. म्हणून शरद पाटील यांनी निंबा यास आपल्या मोटारसायकलवर बसवून घेऊन गेला. त्याला दारू पाजली. त्यातून वाद उकरून काढत सोबत असलेल्या लोखंडी रॉडने निंबावर वार केले. त्यानंतर दोन्ही पायांना अॅल्युमिनिअमच्या ताराने बांधून मृतदेह विहिरीत टाकून दिला.
