नवी दिल्ली – राज्यसभेत दिल्ली दंगलीवर चर्चेदरम्यान काँग्रेस पक्षाने मोदी सरकार कडाडून टीका केली. चर्चेदरम्यान काँग्रेसचे ज्येष्ठ नेते कपिल सिब्बल यांनाही मोदी सरकावर हल्लाबोल केला. दिल्लीतील दंगल म्हणजे लोकांवर झालेला व्हायरसचा अटॅक असल्याचे म्हणत सिब्बल यांनी सभागृहात उपस्थित गृहमंत्री अमित शहा यांच्यावरही हल्लाबोल केला.
सिब्बल यांनी दिल्ली दंगलीला केंद्र सरकार जबाबदार असल्याचे सांगत या दंगलीच्या मागे एक व्हायरस असल्याचे म्हटले आहे. हा व्हायरस चिथावणीखोर भाषणांद्वारे पसरवण्यात आला आहे, असे ते म्हणाले. असे भाषण देणाऱ्यावर कोणतीही कारवाई करण्यात आलेली नाही, असेही सिब्बल म्हणाले. सिब्बल दिल्ली दंगलीवर बोलत असताना गृहमंत्री अमित शहाही सभागृहात उपस्थित होते. सिब्बल यांनी शहा यांच्यावरही टीप्पणी केली. ते म्हणाले, ‘तुम्ही तर लोहपुरुष आहात. सरदार पटेल यांच्या जागी तुम्ही बसला आहात. आपल्या सरदारांचा काहीतरी विचार करा. दिल्लीत कधी दंगली व्हाव्यात असे त्यांना कधीही वाटले नसेल.’
दिल्ली दंगलीवरून गप्प बसावे असा वरूनच इशारा देण्यात आला होता असा आरोपही त्यांनी लावला. दिल्ली दंगल सुरू असताना पंतप्रधान मोदी हे अमेरिकेचे अध्यक्ष डोनाल्ड ट्रम्प यांच्या स्वागतात व्यग्र होते. त्या दरम्यान केंद्र सरकारकडून कोणतेही निवेदन आलेले नाही. पोलिसांना काय काही इशारा देण्यात आला होता का?, असे सिब्बल म्हणाले. केंद्र सरकार गायीच्या रक्षणासाठी सर्वकाही करायला तयार आहे, मात्र माणसांच्या रक्षणासाठी काहीही केले जात नाही, असेही सिब्बल म्हणाले.
सिब्बल यांनी राज्यसभेत बोलताना दिल्ली दंगलीची तुलना बालाकोटमधील सर्जिकल स्टाइकशी केली. दिल्लीची दंगल ही दिल्लीतील लोकांवर सर्जिकल स्ट्राइक केल्यासारखीच आहे, असे सिब्बल म्हणाले. जो व्हायरस तुम्ही पसरवत आहात, त्यावरील उपचार आम्हीच आहोत, असा टोलाही सिब्बल यांनी केंद्र सरकार आणि भाजपला लगावला.
