नवी दिल्ली – जम्मू-काश्मीरमध्ये अशांतता पसरवण्याच्या प्रयत्नात असलेल्या पाकिस्ताननं भारतात दहशतवादी हल्ले घडवून आणण्याचा कट रचल्याची माहिती समोर आली आहे. त्यासाठी पाकिस्ताननं जैश-ए-मोहम्मदचा म्होरक्या मसूद अजहर याच्यासह अन्य एका मोस्ट वॉन्टेड दहशतवाद्याची तुरुंगातून गुपचूप सुटका केली आहे. गुप्तचर यंत्रणांनी यासंदर्भात सरकारला माहिती दिली आहे.
गुप्तचर यंत्रणांकडून मिळालेल्या माहितीनुसार, भारतानं जम्मू-काश्मीरमधून कलम 370 हटवल्यानंतर त्याविरोधात पाकिस्तान येणार्या काळात सियालकोट-जम्मू आणि राजस्थानमध्ये दहशतवादी कारवाया घडवून आणण्याच्या तयारीत आहे. पाकिस्तानच्या याच कटाचा एक भाग म्हणून राजस्थान सीमेजवळ अतिरिक्त पाकिस्तानी सैन्य तैनात करण्यात येत आहेत. यासंदर्भात गुप्तचर यंत्रणांनी सरकारला अॅलर्ट केलं आहे. तसंच भारतात दहशतवादी कारवाया घडवून आणण्यासाठी पाकिस्ताननं जैश-ए-मोहम्मद या दहशतवादी संघटनेचा म्होरक्या मसूद अजहर याची तुरुंगातून गुप्तपणे सुटका केली आहे, अशी माहितीही गुप्तचर यंत्रणांनी दिली आहे.
गुप्तचर यंत्रणांकडून मिळालेल्या माहितीच्या आधारे सीमा सुरक्षा दल आणि लष्कराच्या जवानांना सावध राहण्याच्या सूचना दिल्या आहेत. याशिवाय पाकिस्तानी सैन्याकडून होणार्या संभाव्य कारवायांबाबत सतर्कही केलं आहे, अशी माहिती अधिकार्यांनी दिली.
