जळगाव (प्रतिनिधी) रेल्वे स्थानकावर आलेल्या पक्षकाराकडे कागदपत्र घेण्यासाठी निघालेल्या वकिलाचा भरधाव कंटेनरच्या धडकेत मृत्यू झाल्याची दुर्दैवी घटना आज सोमवार सायंकाळी नेहरू चौकात घडली. योगेश जालमसिंग पाटील (४५, रा. दादावाडी) असे मयताचे नाव आहे. चार दिवसापूर्वीच दुर्दैवी धरणगावच्या वकीलाचाही जळगावात असाच अपघाती मृत्यू झाला होता आणि आज पुन्हा एका वकिलाचा अपघाती मृत्यू झाल्याने हळहळ व्यक्त होतं आहे.
चाळीसगाव तालुक्यातील तमगव्हाण येथील रहिवाशी असलेले योगेश पाटील हे जळगावातील दादावाडीत वास्तव्यास होते जिल्हा न्यायालयात ते वकिली करत असत. योगेश पाटील हे सायंकाळी त्यांच्या शाहु महाराज कॉम्प्लेक्समधील कार्यालयात असताना रेल्वे स्थानकावर आलेल्या एका पक्षकाराचा त्यांना फोन आला. फोन वरील चर्चेनुसार ते पक्षकाराकडील कागदपत्र घेण्यासाठी रेल्वे स्थानकाकडे दुचाकीने (एमएच. १९. सीई.६५११) निघाले. परंतु कोर्ट चौकाडून रेल्वे स्थानकाकडे जात असताना सायंकाळी ५.४५ वाजेच्या सुमारास नेहरू चौकात त्यांच्या दुचाकीला रेल्वे स्थानकाकडून टॉवर चौकाकडून निघालेल्या भरधाव कंटेनरने धडक दिली.
या अपघातात अॅड. योगेश पाटील यांचा जागीच मृत्यू झाला. अपघाताची माहिती मिळताच जिल्हा वकील संघाचे अध्यक्ष अॅड. केतन ढाकेंसह इतर वकील बंधुंनी जिल्हा रूग्णालय गाठले. त्यानंतर शहर पोलिस ठाण्यात कंटेनर चालकाविरूध्द गुन्हा दाखल करण्यात आला आहे.
