जळगाव,(प्रतिनिधी)- चाळीसगाव तालुक्यातील पातोंडा, मुंदखेडा येथील काही प्रकल्पग्रस्त शेतकऱ्यांना हक्काचा मोबदला मिळाला नसल्याने हतबल होऊन १ मे ‘महाराष्ट्र दिनी’ मुंबईतील आझाद मैदानावर सामूहिक आत्मदहन करणार असल्याचा इशारा सुभाष पाटील, जितेंद्र येवले यांच्यासह आदी शेतकऱ्यांनी दिला आहे.
सविस्तर असे की, पातोंडा, मुंदखेडा ता. चाळीसगाव येथील प्रकल्पग्रस्त शेतकरी गेल्या २२ वर्षांपासून हक्काचा मोबदला मिळावा म्हणून सतत शासन दरबारी पाठपुरावा करत आहेत मात्र काही शेतकऱ्यांना हक्काचा मोबदला मिळालेला नाही त्यामुळे शेतकरी त्रस्त व हतबल झाल्याने शेतकऱ्यांनी मुख्यमंत्र्यांना निवेदन देत शेतकऱ्यांच्या संपादित क्षेत्राची रक्कम त्वरित अदा करण्यासाठी कार्यवाही करावी अन्यथा महाराष्ट्र दिनी सामूहिक आत्मदहन करणार असल्याचा इशारा निवेदनाद्वारे दिला आहे.
