जळगाव प्रतिनिधी | राष्ट्रवादी कॉंग्रेसचे नेते गुलाबराव देवकर यांच्या विरोधातील याचिका सर्वोच्च न्यायालयाने फेटाळून लावली आहे. यामुळे देवकरांना मोठा दिलासा मिळाला असून आता देवकर यांना भविष्यात कोणतीही निवडणूक लढण्याचा मार्ग मोकळा झाला आहे. दरम्यान, जिल्हा बँकेच्या अध्यक्षपदाच्या शर्यतीत गुलाबराव देवकर यांचे नाव आघाडीवर आहे.
जळगाव जिल्हा बँकेच्या निवडणुकीत महाविकास आघाडीच्या वतीने सहकार पॅनलमधून माजी मंत्री तथा राष्ट्रवादीचे नेते गुलाबराव देवकर यांनी अर्ज दाखल केला होता. मात्र गुलाबराव देवकर यांना घरकूल घोटाळ्यात न्यायालयाने पाच वर्षांची शिक्षा सुनावली आहे. जिल्हा बँक निवडणूक लढवण्यास त्यांना मज्जाव केला जावा, या मागणीसाठी सर्वोच्च न्यायालयात जिल्हा परिषदेचे आरोग्य आणि शिक्षण सभापती रवींद्र सूर्यभान पाटील यांनी सुप्रीम कोर्टात धाव घेतली होती. तसेच याबाबत पवन ठाकूर यांनीही सुप्रीम कोर्टात याचिका दाखल केली होती. याचिकेवर यापूर्वी दोन वेळा सुनावणी झाली होती.
याचा निकाल आज लागला. यात गुलाबराव देवकर यांच्या वतीने मुकुल रोहतगी आणि अनिकेत निकम यांनी प्रभावी युक्तीवाद केला. यामुळे सुप्रीम कोर्टाने त्यांच्या विरोधातील याचिका फेटाळून लावली आहे. परिणामी देवकर यांचे जिल्हा बँकेचे संचालकपद शाबूत राहिले आहे. यासोबत त्यांचा भविष्यात निवडणूक लढविण्याचा मार्ग देखील मोकळा झाला आहे.
