अहमदाबाद : गुजरातचे मुख्यमंत्री विजय रुपाणी यांनी मुख्यमंत्रीपदाचा आज शनिवारी तडकाफडकी राजीनामा दिला आहे. त्यांच्या राजीनाम्याचं नेमकं कारण समजू शकले नाही. मात्र, रुपाणी यांच्या राजीनाम्याने गुजरातच्या राजकीय वर्तुळात एकच खळबळ माजली आहे.
मुख्यमंत्री विजय रुपाणी यांनी थोड्या वेळापूर्वीच पत्रकार परिषद घेऊन आपण पदाचा राजीनामा देत असल्याचं जाहीर केलं. यावेळी त्यांनी पंतप्रधान नरेंद्र मोदी, केंद्रीय गृहमंत्री अमित शहा आणि भाजपचे राष्ट्रीय अध्यक्ष जेपी नड्डा यांचे त्यांनी संधी दिल्याबद्दल आभार मानले.
दरम्यान, पुढील वर्षी डिसेंबर 2022 मध्ये गुजरातमध्ये विधानसभा निवडणुका होणार आहेत. त्याआधी विजय रुपाणी यांनी मुख्यमंत्रिपदाचा राजीनामा दिल्याने भाजपला मोठा धक्का बसला असल्याचे बोलले जात आहे. रुपाणी यांच्या राजीनाम्याने गुजरातच्या राजकीय वर्तुळात एकच खळबळ माजली आहे.
सूत्रांनी दिलेल्या माहितीनुसार, आता नव्या नेतृत्वासह भाजप गुजरातमध्ये पुढील निवडणूक लढवणार आहे. गेल्या काही महिन्यांपासून आम आदमी पक्षही राज्यात भाजपला कडवी स्पर्धा देत आहे. पक्षाने रूपाणी सरकारला जोरदार घेरले आहे, कोरोना विषाणूच्या दुसऱ्या लाटेसह अनेक मुद्दे उपस्थित केले आहेत, तर काँग्रेसने गेल्या गुजरात निवडणुकांमध्येही चांगली कामगिरी केली. तेव्हापासून काँग्रेसचे कार्यकर्तेही गुजरातमध्ये सक्रियपणे मुद्दे मांडत आहेत.
विजय रुपाणी यांच्यानंतर नवे मुख्यमंत्री कोण होणार याबाबत कोणतीही माहिती नाही. काही वर्षे वगळता गुजरातमध्ये 1995 पासून बहुतेक भाजपाचे सरकार आहे. सध्याचे पंतप्रधान नरेंद्र मोदी हेही दीर्घकाळ गुजरातचे मुख्यमंत्री राहिले आहेत.
