जळगाव : भोसरी जमीन गैरव्यवहार प्रकरणात ईडीच्या रडारवर असलेले राष्ट्रवादीचे ज्येष्ठ नेते एकनाथ खडसे यांच्यावर सामाजिक कार्यकर्त्या अंजली दमानिया यांनी पुन्हा निशाणा साधला आहे.
खडसे यांच्यावर शस्त्रक्रिया होणार असल्याने ते मुंबईतील बॉम्बे रुग्णालयात उपचारासाठी दाखल झाले असल्याचे त्यांच्या वकिलांनी सांगितले आहे. दरम्यान, खडसे रुग्णालयात दाखल झाल्याच्या मुद्द्यावरून सामाजिक कार्यकर्त्या अंजली दमानिया यांनी या ट्वीट करून हा खोटेपणा असल्याचे सांगत खडसेंवर निशाणा साधला आहे.
एकनाथ खडसे ४ ऑक्टोबर रोजी मुंबईत बॉम्बे हॉस्पिटलमध्ये उपचारासाठी दाखल झाले आहेत. ते अतिदक्षता विभागात दाखल असून, त्यांच्यावर शस्त्रक्रिया होणार असल्याची माहिती निकटवर्तीयांनी दिली आहे. खडसेंवर किडनीची शस्त्रक्रिया होणार असल्याचे सांगितले जात आहे. एकनाथ खडसे व त्यांच्या पत्नी मंदाकिनी खडसे या पुण्यातील भोसरी येथील वादग्रस्त भूखंड खरेदी प्रकरणात ईडीच्या रडारवर आहेत. या प्रकरणात त्यांचे जावई गिरीश चौधरी अटकेत आहेत. दरम्यान, या व्यवहारात मदत केल्याचा ठपका ठेवून अटक करण्यात आलेले तत्कालीन उपनिबंधक रवींद्र मुळे यांना ईडीने गेल्या आठवड्यापूर्वी अटक केली होती. त्यांना दोन दिवसांपूर्वी जामीन मिळाला आहे. सोमवारी पीएमएलए न्यायालयाने एकनाथ खडसे आणि त्यांच्या पत्नी मंदाकिनी खडसे यांना गुरुवारपर्यंत न्यायालयात हजर राहण्याचे निर्देश दिले होते.
या पार्श्वभूमीवर मुंबईतील सामाजिक कार्यकर्त्या अंजली दमानिया यांनी आपल्या ट्विटर हँडलवर एक ट्वीट करून खडसेंना लक्ष्य केले. आपल्या ट्वीटमध्ये दमानिया यांनी, ‘आज सत्र न्यायालयात खडसेंच्या वकिलांनी खडसेंबाबत माहिती दिली. खडसेंना अपंगत्व असल्याने त्यांना हॉस्पिटलमध्ये अतिदक्षता विभागात दाखल करण्यात आले आहे. त्यांच्यावर शस्त्रक्रिया करण्यात येणार आहे. हा खोटेपणाचा कळस आहे. न्यायालयासमोर प्रत्यक्ष हजर न राहण्यासाठी हे खोटे सांगितले जात आहे’, असा आरोप दमानिया यांनी केला आहे.
