नवी दिल्लीः – दिल्ला विधानसभा निवडणुकीनंतर सर्वांच्या नजरा केजरीवाल यांच्या मंत्रिमंडळाकडे लागल्या होत्या. मंत्रिमंडळात यावेळी कुणाची वर्णी लागणार? यावर सस्पेंस होता. पण हा सस्पेंस आता संपला आहे. आधीच्या सरकारमध्ये असलेले मंत्रीच नव्याने शपथ घेतील, अशी माहिती आता समोर आलीय. मंत्र्यांची यादीही राष्ट्रपती रामनाथ कोविंद यांच्याकडे पाठवण्यात आलीय. येत्या रविवारी केजरीवाल यांच्यासह मंत्र्यांचाही शपथविधी होणार आहे.
ज्या सरकारच्या आणि मंत्र्यांच्या जोरावर दिल्लीत पुन्हा ‘आम आदमी पार्टी’ची सत्ता आली, त्यांनाच आता पुन्हा मंत्रीपद द्यायला हवं, असं केजरीवाल यांचं म्हणणं आहे. अतिशी मर्लेना आणि राघव चड्ढा यांची मंत्रिमंडळात वर्णी लागणार अशी चर्चा होती. पण या नावांना कुणीही दुजोरा दिलेला नाही.
मागील सरकारमधील मंत्री कायम राहणार
मनिष सिसोदिया, गोपाल राय, इमरान हुसेन, सत्येंद्र जैन, कैलास गहलोत आणि राजेंद्र पाल गौतम हे मागील सरकारमध्ये मंत्री होते. मुख्यमंत्र्यांसह दिल्लीतील मंत्रिमंडळात मंत्र्यांची संख्या किमान ७ इतकी असू शकते. आतिशी, राघव चड्ढा, दिलीप पांड्ये आणि सौरभ भारद्वाज यांच्यापैकी एकाची मंत्रिमंडळात वर्णी लागेल, अशी या आधी चर्चा होती. पण आता अशी कुठलीही शक्यता नसल्याचं सांगण्यात येतंय.
