चोपडा : चोपडा आगारातील वाहकाचा कारणे दाखवा नोटीसीच्या धास्तीने हृदयविकाराच्या झटक्याने मृत्यू झाला आहे. राजेंद्र खंडू वाणी (वय ५५) असे वाहकाचे नाव असून या घटनेनंतर चोपडा आगारातील वाहक व चालकांनी मृत वाणी यांच्या मुलास नोकरी देण्याचे लेखी आश्वासन द्यावे, या मागणीसाठी आगारप्रमुख संदेश क्षीरसागर यांना दोन तास घेराव घातला.
याबाबत असे की, चोपडा तालुक्यातील चहार्डी येथील रहिवासी तथा एसटीचे वाहक राजेंद्र वाणी यांना १० वाहकारोजी कामावर रुजू होण्यासंदर्भात, कारणे दाखवा नोटीस पोस्टाने मिळाली होती. नोटीस वाचल्यानंतर त्यांना हृदयविकाराचा झटका आला. तर ११ रोजी चोपडा येथील खासगी रुग्णालयातून जळगावला नेताना वाटेत पुन्हा हृदयविकाराचा तीव्र झटका आल्याने त्यांचा मृत्यू झाला.
वाणी यांचा मृतदेह आगारात आणण्याचा इशारादेखील कर्मचाऱ्यांनी दिला होता. त्यामुळे आगारप्रमुख क्षीरसागर यांनी जळगाव येथील विभाग नियंत्रक भगवान जगनोर यांच्याशी भ्रमणध्वनीवरून संपर्क साधून माहिती दिली. जगनोर यांनी वाणी यांच्या मुलास अनुकंपा तत्त्वावर नोकरीला लावण्यासाठी तोंडी आश्वासन दिले. त्यानंतर मृत वाणी यांचे नातेवाईक व संतप्त कर्मचारी शांत झाले. यावेळी चहार्डी येथील बाजार समितीचे संचालक भरत पाटील, धनंजय सुर्वे व चालक-वाहकांमधून सी.पी. कोळी, आर.एन. सोनवणे, एन.एम. जोशी, एस.जी. कदम आदी उपस्थित होते.
