मुंबई – महाराष्ट्र विधानसभा निवडणुकीसाठी काँग्रेसने घटस्थापनेच्या मुहूर्तावर 51 उमेदवारांची पहिली यादी रविवारी जाहीर केली. प्रदेश काँग्रेसचे अध्यक्ष बाळासाहेब थोरात, माजी मुख्यमंत्री अशोक चव्हाण, विधानसभेतील विरोधी पक्षनेते विजय वडेट्टीवार, यांच्यासह माजी मुख्यमंत्री पृथ्वीराज चव्हाण वगळता बहुतेक मावळत्या आमदारांचा पहिल्या यादीत समावेश आहे.
राष्ट्रवादी काँग्रेससोबत केलेल्या आघाडीसह काँग्रेस 125 जागांवर निवडणूक लढवित आहे. जाहीर झालेल्या पहिल्या यादीवर राज्यातील पक्षाच्या बड्या आणि स्थानिक नेत्यांच्या घराणेशाहीचा ठसा उमटला असून, मातापित्यांच्या पूर्वपुण्याईच्या जोरावर सोळा जणांना उमेदवारी लाभली आहे. त्यात अमित देशमुख, प्रणिती शिंदे, वर्षा गायकवाड, विश्वजीत कदम, यशोमती ठाकूर, अशोक पाटील, शिरीष नाईक, शिरीष चौधरी, अमर काळे, संग्राम थोपटे, ऋतुराज पाटील यांचा प्रामुख्याने समावेश आहे.
