पाचोरा : निसर्गाच्या लहरीपणामुळे शेताचे उत्पन्न हाती आले नाही. झालेला खर्चही हाती न आल्याने घर संसाराचा गाडा कसा ओढायचा याच विवंचनेतून एका शेतकऱ्याने घराजवळील चिंचेच्या झाडाला गळफास घेऊन आत्महत्या केल्याची घटना घडलीय. अल्लाउद्दीन सांडू तडवी (वय ४२) असे आत्महत्या केलेल्या शेतकऱ्याचे नाव आहे.
याबाबत असे की, पाचोरा तालुक्यातील शिंदाड येथून जवळ असलेल्या पिंप्री प्र.लो. येथील अल्लाउद्दीन सांडू तडवी (वय ४२) हे अल्पभूधारक शेतकरी असून दोन एकर शेतजमीन आहे. पत्नी, दाेन मुले, एक मुलगी सून असा परिवार आहे. शेतजमीन कसून व मोलमजुरी करून हे कुटुंब आपला उदरनिर्वाह चालवत होते. परंतु यावर्षी निसर्गाच्या लहरीपणामुळे शेताचे उत्पन्न हाती आले नाही. झालेला खर्चही हाती न आल्याने घर संसाराचा गाडा ओढताना दैनंदिन लागणारा खर्च, कधीकधी आजारपण व इतर संकटात लागणारा खर्च यामुळे अल्लाउद्दीन हतबल झाला होता.
म्हणून कुठूनतरी कर्ज काढून संसाराचा गाडा ओढायचा या हेतूने त्याने भारत फायनान्स, स्वतंत्र फायनान्स व ग्राम शक्ती फायनान्स या खाजगी फायनान्सच्या माध्यमातून कर्ज घेतले हाेते. मोलमजुरी करुन कर्जफेड करू, अशी त्याची अपेक्षा होती. परंतु अपेक्षेप्रमाणे मजुरी मिळत नसल्याने घरसंसार चालवून बचत गटाचा हप्ता फेडणे मुश्कील झाले होते. परंतु नियमाप्रमाणे बचत गटाचा वसुली प्रतिनिधी कर्जवसुलीसाठी सतत तगादा लावून घराभोवती फिरत होते या सततच्या तगाद्याला ताे वैतागला हाेता. अल्लाउद्दीन याने कर्जबाजारीपणाला कंटाळून आत्महत्या केल्याची चर्चा सार्वे -पिंप्री गावामधील जनमानसात सुरू अाहे. या प्रकरणी पाेलिसांत नाेंद करण्यात अाली असून अात्महत्येच्या नेमक्या कारणांचा पाेलिस तपास करत अाहेत.
