जळगाव : एरंडोल तालुक्यातील पिंपळकोठा येथील महामार्गावर भरधाव वेगाने जाणाऱ्या कारने उभ्या ट्रकला मागच्या बाजूने जोरदार धडक दिल्याने झालेल्या भीषण अपघातात चार जण जागीच ठार झाले, तर एक जण गंभीर जखमी झाल्याची घटना बुधवारी सायंकाळी घडली. मृतदेह एरंडोल ग्रामीण रुग्णालयात हलवण्यात आले आहेत. या ठिकाणी मृतांच्या नातेवाईकांनी मोठा आक्रोश केला.
अपघातातील मृतांची नावे :
या अपघातात विजयसिंग हरी परदेशी (वय ६५), तुषार उर्फ जयदीप मदन सिंग परदेशी (वय ३७), चतरसिंग पदम सिंग परदेशी (वय ४०, तिघे रा. जामडी ता. चाळीसगाव) आणि आबा रामचंद्र पाटील (वय ५५, वडजी ता. भडगाव) अशी मृतांची नावे आहेत. तसंच रायसिंग पद्मसिंग राजपूत (वय ३७ रा. जामडी ता. चाळीसगाव) हा अपघातात गंभीर जखमी झाला आहे.
याबाबत असे कि परदेशी कुटुंबीय बुधवारी कार क्रमांक (एमएम १९ सीझेड ७३६०) ने एरंडोलकडून जळगावकडे जात होते. यादरम्यान भरधाव कारने पिंपळकोठ्याजवळ रस्त्यालगत प्रवासी उतरवीत असलेल्या एम.एच १८ ए.ए.८८६७ क्रमाकांच्या उभ्या ट्रकला जोरदार धडक दिली. हा अपघात इतका भीषण होता की कारमधील चालक चतरसिंग परदेशी, विजयसिंग परदेशी, जयदीप मदनसिंग परदेशी व आबा पाटील हे चौघे जागीच ठार झाले, तर रायसिंग पदमसिंग राजपूत हे थोडक्यात बचावले असून जखमी झाले आहेत. त्यांना पुढील उपचारार्थ जळगाव जिल्हा रुग्णालयात हलवण्यात आलं आहे.
अपघातामुळे महामार्गावरील दोन्हीकडील वाहतूक ठप्प झाली होती. घटनेची माहिती मिळाल्यावर एरंडोल पोलीस स्टेशनचे पोलीस हेडकॉन्स्टेबल काशिनाथ पाटील, अनिल पाटील आणि कर्मचाऱ्यांनी वाहतूक सुरळीत केली.
