जळगाव : भोसरी येथील भूखंड प्रकरणात राष्ट्रवादीचे ज्येष्ठ नेते एकनाथ खडसे यांच्या पत्नी मंदाकिनी खडसे यांचा अटकपूर्व जामीन अर्ज फेटाळण्यात आला आहे. त्यांच्याविरोधात अजामीनपात्र वॉरंट काढण्यात आले आहे. त्याचवेळी एकनाथ खडसे यांना प्रकृतीच्या कारणास्तव तूर्तास दिलासा देऊन कोर्टाने पुढील सुनावणी २१ ऑक्टोबरला ठेवली आहे.
पुणे येथील भोसरी भूखंड खरेदी प्रकरणात खडसे यांचे जावई गिरीश चौधरी यांना अटक करण्यात आलेली आहे. याच प्रकरणात एकनाथ खडसे आणि मंदाकिनी खडसे यांच्यावरही ईडीकडून आरोप ठेवण्यात आलेले आहेत. या दोघांवरही अटकेची टांगती तलवार असतानाच आज पीएमएलए विशेष कोर्टात मंदाकिनी खडसे यांना मोठा धक्का बसला. मंदाकिनी यांचा अटकपूर्व जामीन अर्ज आज पीएमएलए विशेष कोर्टाने फेटाळला आणि त्यांच्याविरुद्ध अजामीनपात्र वॉरंट काढला आहे. त्यामुळे त्यांच्या अडचणी वाढल्या आहेत.
तर दुसरीकडे एकनाथ खडसे यांच्यावर शस्त्रक्रिया झाली आहे. सध्या ते मुंबई रुग्णालयात दाखल आहेत. त्यामुळे ते आज सुनावणीसाठी न्यायालयात हजर राहू शकले नाहीत. खडसे यांना अजून काही दिवस रुग्णालयात राहावे लागणार आहे, असे सांगत त्यांच्या वकिलांनी न्यायालयात हजर राहण्यासाठी आणखी वेळ मिळावा, अशी विनंती केली. त्यावर खडसे यांची ही विनंती न्यायालयाने मान्य केली व या प्रकरणात पुढील सुनावणी २१ ऑक्टोबर रोजी ठेवली आहे.
