यवतमाळ : एकतर्फी प्रेमातून एका तरुणीची निर्घृण हत्या केल्याची धक्कादायक घटना यवतमाळमध्ये घडली आहे. तरुणाने तरुणीला एमआयडीसीतील जंगल परिसरात नेले. तुझं दुसऱ्या मुलाशी अफेअर आहे. असे म्हणून तिच्या डोक्यावर दगडाचे घाव घालून तिला जीवानिशी ठार केले. तसेच तरुणाने त्याच परिसरातील रस्त्यावर स्वतःच्या गळ्यावर शस्त्राने वार करून आत्महत्या करण्याचा प्रयत्न केला. दरम्यान, जखमी प्रियकरला यवतमाळच्या शासकीय रुग्णालयात उपचारार्थ दाखल करण्यात आले. गंभीर तरुणावर जिल्हा सामान्य रुग्णालयात उपचार सुरू आहेत. शुभम असं जखमी तरुणाचे नाव आहे.
आरोपी तरुणाचं मृतक तरुणीवर एकतर्फी प्रेम होतं. आरोपी तरुणाचे नाव शुभम असं असल्याची माहिती समोर आली आहे. आरोपी तरुणाने मुलीला एमआयडीसी परिसरात भेटण्यासाठी बोलावलं. त्यानंतर मुलीवर दगडाने हल्ला केला. दगडाने ठेचल्यावर आरोपी शुभम याने तरुणीवर धारदार शस्त्राने सपासप वार केले. या हल्ल्यात तरुणीचा मृत्यू झाला आहे.
पोलिसांनी दिलेल्या माहितीनुसार, आरोपी शुभम याचं मृतक तरुणीवर प्रेम होतं. एकतर्फी प्रेमात तो वेडा झाला होता. या मुलीचं दुसऱ्या मुलासोबत प्रेमसंबंध होते असा संशय शुभमला होता. यानंतर शुभमने तिला एमआयडीसी परिसरात भेटायला बोलावले आणि मग तिच्यावर हल्ला केला.
तरुणीची हत्या केल्यानंतर आरोपी शुभम याने देखील स्वत:ला संपवण्याचा प्रयत्न केला. शुभम याने स्वत:वर देखील चाकूने वार केले. शुभम हा रक्ताच्या थारोळ्यात पडला होता.
