मुंबई – मनसेने मराठीसोबतच हिंदुत्वाचा झेंडाही खांद्यावर घेतल्यानंतर महाराष्ट्रात मनसे व भाजप या दोन पक्षांमधील जवळीक अधिकच वाढत चालली असून भाजप नेते अॅड. आशिष शेलार यांनी बुधवारी कृष्णकुंज निवासस्थानी राज ठाकरे यांची भेट घेतल्याची व या दोन नेत्यांमध्ये सुमारे तासभर विविध विषयांवर खलबतं झाल्याची खात्रीशीर माहिती आता पुढे आली आहे.
आशिष शेलार बुधवारी सायंकाळी सात वाजता ‘कृष्णकुंज’वर दाखल झाले. सुमारे तासभर शेलार राज यांच्या निवासस्थानी होते. यादरम्यान या दोन्ही नेत्यांमध्ये विविध विषयांवर चर्चा झाल्याचे सांगण्यात येत आहे. पाकिस्तानी आणि बांगलादेशी घुसखोरांविरुद्ध मनसे ९ फेब्रुवारी रोजी मुंबईत मोर्चा काढत आहे. हा मोर्चा एकप्रकारे नागरिकत्व कायद्याचे समर्थन करणाराच असून भाजपचा अप्रत्यक्षपणे या मोर्चाला पाठिंबा राहणार आहे. त्याअनुशंगाने या दोन्ही नेत्यांत चर्चा झाल्याचेही सूत्रांचे म्हणणे आहे. माध्यमांना कोणतीही कुणकुण लागू न देता या दोन नेत्यांची भेट झाली.
दरम्यान, शिवसेना-भाजप युती तुटली असतानाच मनसेने अचानक हिंदुत्वाचा झेंडा खांद्यावर घेतला आहे. त्यामुळे महाराष्ट्रातील या बदलत्या राजकीय स्थितीत हिंदुत्वाची कास धरणारा मनसे हा पक्ष आपला नवा मित्र होऊ शकतो, असे भाजपला वाटत आहे. त्यातूनच या दोन्ही पक्षांच्या नेत्यांच्या भेटीगाठी वाढत चालल्या आहेत. ७ जानेवारी रोजी प्रभादेवी येथील इंडिया बुल्स स्काय येथे राज ठाकरे व विरोधी पक्षनेते देवेंद्र फडणवीस यांची गुप्त भेट झाली होती. सुमारे एक ते दीड तास या दोन नेत्यांमध्ये चर्चा झाली होती. या भेटीबाबतही कमालीची गुप्तता बाळगण्यात आली होती. दुसरीकडे भाजपचे प्रदेशाध्यक्ष चंद्रकांत पाटील यांनी मनसेच्या नव्या भूमिकेचे जाहीरपणे स्वागत केले होते. मनसे हिंदुत्वाच्या मार्गाने वाटचाल करणार असेल तर ती स्वागतार्ह बाब आहे, असे म्हणून आमच्या पक्षाची भूमिका व मते जुळली तर मनसेच काय अशा समविचारी कोणत्याही पक्षाशी मैत्री शक्य आहे, असे पाटील म्हणाले होते.
