मुंबई- कॉम्रेड गोविंद पानसरे यांच्या हत्याप्रकरणाच्या तपासात अपेक्षित प्रगती होत नसल्याबद्दल मुंबई उच्च न्यायालयाने एसआयटीला कडक शब्दात फटकारले आहे. अन्य तपास यंत्रणांनी केलेल्या तपासावर विसंबून राहू नका. तुमच्या तपास कामात प्रगती दाखवा, अशा शब्दात कोर्टाने एसआयटीला खडेबोल सुनावले आहेत.
पानसरे हत्याप्रकरणावर आज उच्च न्यायालयात सुनावणी झाली. यावेळी कोर्टाने एसआयटीला चांगलेच फैलावर घेतले. तर पानसरे हत्या प्रकरणातील तीन संशयित आरोपीच्या कोठडीत चार दिवसाने वाढ करण्यात आली आहे. अन्य संशयित आरोपींचा शोध घेण्यासाठी या संशयितांना कोठडी सुनावण्यात यावी, अशी मागणी पोलिसांनी केली होती. बेळगाव येथील जंगलात या संशयितांना पिस्तूल चालविण्याचे प्रशिक्षण देण्यात आले होते. त्यात आणखी तिघांचा सहभाग असल्याचा संशय पोलिसांनी व्यक्त केला होता.
दरम्यान, डॉ. नरेंद्र दाभोलकर हत्या प्रकरणी हल्लेखोरांनी हत्येसाठी वापरलेले पिस्तूल खाडीपात्रातून शोधण्यासाठी आणखी अवधी देण्याची मागणी सीबीआयने कोर्टाला केली. या तपासासाठी आणखी चार आठवड्यांचा अवधी आवश्यक असल्याचे सीबीआयने कोर्टाला सांगितले.
तपास अधिकार्याने 50 लाखांची ऑफर दिली-दरम्यान, संशयित आरोपी सचिन अंदूरे याने या प्रकरणातील तपास अधिकार्यावरच गंभीर आरोप केले आहेत. हे प्रकरण संपविण्यासाठी तपास अधिकारी अमृत देशमुख यांनी आपल्याला 50 लाखांची ऑफर दिल्याची तक्रार अंदूरेने कोर्टात केली आहे.
