जळगाव,(प्रतिनिधी)- लोकसभा निवडणूकांचे बिगुल वाजले असतांना राज्यातील राजकारण देखील तापलं आहे. आमदार अपात्रता प्रकरण, पक्ष कुणाचा याबाबतचा निर्णय, मे. सर्वोच्च न्यायालयातील सुरु असलेल्या सुनावण्या साऱ्याकाही घडामोडी महाराष्ट्राच्या राजकारणात दररोज नवनवीन घडामोडी घडत असतांना नुकतेच राष्ट्रवादी काँग्रेस पार्टी शरद पवार यांच्या पक्षाला तुतारी वाजवत असलेला माणूस नवीन चिन्ह मिळालं आहे चिन्हाचे शरद पवार गटाकडून ब्रांडिंग होतं असतांना विरोधक मात्र खोचक टीका करत आहे.
दरम्यान राज्याचे पाणी पुरवठा मंत्री तथा जळगाव जिल्ह्याचे पालकमंत्री गुलाबराव पाटील यांना एका भूमिपूजनाच्या कार्यक्रमानंतर पत्रकारांनी राष्ट्रवादी काँग्रेस पक्ष शरद पवार गटाला नुकतचं तुतारी वाजवत असलेला माणूस नवीन चिन्ह देण्यात आलं असून याबाबत आपण काय सांगाल असा प्रश्न केला असता ‘तुतारी’ कुणासाठी वाजणार हे माहिती नाही, त्यांनी तुतारी वाजवावी आम्ही धनुष्यबाण काढलेला आहे असं म्हणत शरद पवार गटावर खोचक टीका केली आहे.
शरद पवार यांचे समर्थक आमदार जितेंद्र आव्हाड यांनी x सोशल मीडिया प्लॅटफॉर्मवर ट्विट करून म्हटलं आहे की,निवडणूक आयोगाकडे आम्ही ज्या तीन निशाणी सुचविल्या होत्या. त्यातील चिन्ह न देता आम्हाला त्यांनी “तुतारी” हे चिन्ह दिले. लढण्यासाठी शुभेच्छाच दिल्या आहेत. हा आमच्यासाठी ‘शुभसंकेत’ आहे. याबद्दल निवडणूक आयोगाचे आभार मानतो. कारण, त्यांनी सांकेतिक भाषेत ‘तुम्ही युद्धाला उभे रहा आणि जिंका’ असाच संदेश शरद पवार नावाच्या योद्ध्याला आणि त्यांच्या सैनिकांना “तुतारी” हे चिन्ह देऊन दिला आहे.
दरम्यान राष्ट्रवादी काँग्रेस पक्ष शरद पवार गटाला चिन्ह मिळाल्यावर पक्षाच्या वतीने ‘केशवसूत’यांच्या कवितेतील ओळी पक्षाच्या x प्लॅटफॉर्म वर लिहून लोकसभा निवडणुकीचे रणशिंग फुंकले आहे.
“एक तुतारी द्या मज आणुनि
फुंकिन मी जी स्वप्राणाने
भेदुनि टाकिन सगळी गगने
दीर्घ जिच्या त्या किंकाळीने
अशी तुतारी द्या मजलागुनी!”
“महाराष्ट्राच्या इतिहासात छत्रपती शिवरायांच्या शौर्यानं ज्या तुतारीने दिल्लीच्या तख्ताच्याही कानठळ्या बसवल्या होत्या, तीच ‘तुतारी’ आज निवडणूक चिन्ह म्हणून निश्चित होणं ही ‘राष्ट्रवादी काँग्रेस पक्ष- शरदचंद्र पवार’साठी गौरवास्पद बाब आहे. महाराष्ट्राचं आराध्यदैवत छत्रपती शिवाजी महाराज, फुले, शाहू, आंबेडकरांच्या पुरोगामी विचारांनी, आदरणीय खा. शरदचंद्र पवार साहेबांच्या साथीने दिल्लीच्या तख्ताला हादरवून सोडण्यासाठी हीच ‘तुतारी’ पुन्हा एकदा रणशिंग फुंकण्याकरिता सज्ज आहे!”असल्याचं पक्षाच्या वतीने ट्विट करण्यात आलं आहे.
