मुंबईः – राज्यात महाविकास आघाडी सरकार स्थापन झाल्यानंतर काँग्रेस नेत्यांनी केलेल्या वादग्रस्त विधानांमुळे महाविकास आघाडी सरकारमध्ये धुसफूस सुरू असल्याची चर्चा सुरू असतानाच आता काँग्रेस राष्ट्रवादीचे मित्रपक्ष असलेल्या समाजवादी पार्टीच्या एका नेत्याने वादग्रस्त विधान केले आहे. राज्याचे मुख्यमंत्री व शिवसेनेचे पक्षप्रमुख उद्धव ठाकरे अयोध्येला जाणार असतील तर मीही त्यांच्यासोबत अयोध्येला जाईन, व त्या ठिकाणी मशीद बांधणार, असे खळबळजनक विधान समाजवादी पार्टीचे नेते अबू आझमी यांचे पुत्र फरहान आझमी यांनी केल्याने वाद उभा राहण्याची शक्यता आहे.
राज्यातील महाविकास आघाडी सरकारला १०० दिवस पूर्ण झाल्यानिमित्त मुख्यमंत्री उद्धव ठाकरे हे अयोध्येला जाणार आहेत, अशी घोषणा शिवसेनेचे खासदार संजय राऊत यांनी केली होती. त्यांच्या या घोषणेनंतर भाजपने टीका केली होती. आता समाजवादी पार्टीचे नेते अबू आझमी यांचे पुत्र फरहान आझमी यांनी उद्धव ठाकरे यांच्यावर टीका केली आहे. जर उद्धव ठाकरे अयोध्यामध्ये जाऊन राम मंदिर बांधणार असतील तर आम्हीसुद्धा अयोध्याला जाणार पण तिथे आम्ही बाबरी मशीद बांधणार, असे आझमी यावेळी म्हणाले. फरहान यांच्या या विधानांनंतर एकच खळबळ उडाली आहे. ‘महाविकास आघाडी सरकारला १०० दिवस पूर्ण झाल्यानंतर मुख्यमंत्री उद्धव ठाकरे हे अयोध्येला जाण्याचा निर्णय मुस्लिमांना घाबरवण्यासाठी घेतला आहे. पण मी त्यांना सांगू इच्छितो की, जगभरात २०५ अब्ज लोकसंख्या आहे. त्यामध्ये ५० टक्क्यांपेक्षा पेक्षा जास्त मुस्लिम देश आहेत जे आम्हाला हसत-खेळत आमच्या देशात आम्हाला परत घेऊन जातील. पण आम्ही जाणार नाही, असे फरहान आझमी म्हणाले.
