मुंबई प्रतिनिधी । महाराष्ट्र लोकसेवा आयोगाच्या एमपीएससीच्या परीक्षेला बसण्यासाठी विद्यार्थ्यांना वयोमर्यादेत एक वर्षाची शिथिलता देण्याचा निर्णय राज्य सरकारने घेतला असल्याची माहिती सामान्य प्रशासन राज्यमंत्री दत्तात्रय भरणे यांनी बुधवारी दिली.
राज्य मंत्रिमंडळाच्या बैठकीत हा निर्णय घेण्यात आला असल्याची माहिती त्यांनी दिली. आता प्रस्तावित असणाऱ्या पीएसआयच्या परीक्षेसाठीदेखील हा निर्णय लागू राहणार असल्याचेही त्यांनी सांगितले.
कोरोनामुळे दोन वर्षे एमपीएससीच्या परीक्षा झाल्या नव्हत्या. त्यामुळे वयोमर्यादा दोन वर्षे वाढवावी, अशी मागणी होत होती. याबाबत मंत्रिमंडळाच्या बैठकीत चर्चा करण्यात आली. मुख्यमंत्री उद्धव ठाकरे आणि उपमुख्यमंत्री अजित पवार यांनी वयोमर्यादा वाढवण्याच्या निर्णयास मान्यता दिली. लाखोंच्या संख्येत विद्यार्थी या परीक्षा देत असतात. त्यांना या निर्णयाचा फायदा होणार असल्याचेही दत्तात्रय भरणे यांनी सांगितले.
कोरोनामुळे मध्यंतरीच्या काळात एमपीएससी परीक्षा होऊ न शकल्याने अनेक उमेदवारांचे वय वाढले. इच्छुकांना परीक्षा देता आली नाही, शिवाय नंतर परीक्षा देण्याची संधीही मिळणार नव्हती. त्यामुळे हा निर्णय घेण्यात आला आहे.
