जळगाव (प्रतिनिधी) – खान्देश कॉलेज एज्युकेशन सोसायटीच्या ८१ व्या वर्धापन दिनानिमित्त विविध कार्यक्रमांचे भव्य आयोजन १६ सप्टेंबर रोजी करण्यात आले आहे. या कार्यक्रमात केसीईच्या सर्व संस्थांचा सहभाग असणार असल्याची माहिती संस्थेचे उपाध्यक्ष अँड. प्रकाश पाटील यांनी दिनांक १३ सप्टेंबर रोजी झालेल्या पत्रकार परिषदेत दिली.
पत्रकार परिषदेत बोलतांना संस्थेचे उपाध्यक्ष अँड. प्रकाश पाटील पुढे म्हणाले की,खान्देश कॉलेज एज्युकेशन (KCE) सोसायटी ही शिक्षण क्षेत्रातील अग्रगण्य संस्था १९४४ साली जळगाव येथे स्थापन झाली. सुरुवातीला मराठा विद्या प्रसारक संस्थेच्या वास्तूतून कार्याला सुरुवात करून १९४९ मध्ये दानशूर मूळजी जेठा यांनी दिलेल्या जागेत संस्थेची भक्कम उभारणी करण्यात आली. “ज्ञान प्रसारो व्रतम” या ब्रीदवाक्याने समाजातील सर्व घटकांपर्यंत शिक्षण पोहोचविण्याचे कार्य ही संस्था सातत्याने करत आली आहे.
संस्थेची विशेष कामगिरी
मागील पाच वर्षांत संस्थेने उल्लेखनीय प्रगती केली असून आयएमआर, इंजिनीअरिंग कॉलेज, मुलांचे वसतिगृह, लॉ कॉलेज, तसेच ५०० प्रेक्षक क्षमतेचे सुसज्ज नाट्यगृह उभारण्यात आले आहे.
राष्ट्रीय शिक्षण धोरण (NEP) २०२० च्या मार्गदर्शक तत्वांनुसार केसीई सोसायटी अभियांत्रिकी, व्यवस्थापन, विज्ञान, कला, वाणिज्य, भारतीय ज्ञान प्रणाली (IKS), भारतीय संगीत, रिफ्लेक्सोलॉजी, निसर्गोपचार आणि योग विज्ञान अशा विविध शाखांमध्ये पदवी, पदव्युत्तर आणि डॉक्टरेट स्तरावरील व्यावसायिक अभ्यासक्रम सुरू करत आहे.
१६ सप्टेंबरला भव्य कार्यक्रम
संस्थेच्या ८१ वर्षांच्या प्रवासानिमित्त दिनांक १६ सप्टेंबर २०२५ रोजी सकाळी ९.४५ वाजता केसीईच्या प्रांगणात भव्य कार्यक्रमाचे आयोजन करण्यात आले आहे.या कार्यक्रमात एकूण १७ उपक्रम होणार असून प्रथमच केसीईच्या सर्व संस्था एकत्र येऊन त्यांच्या वाटचालीचे विविध अंगांनी सादरीकरण करणार आहेत.कार्यक्रमाचे अध्यक्षस्थान संस्थेचे उपाध्यक्ष अँड. प्रकाश पाटील भूषवणार आहेत.
प्रमुख उपस्थिती म्हणून क.ब.चौ.उ.म.वि. चे कुलगुरू मा. विजय माहेश्वरी आणि विशेष अतिथी म्हणून उप कुलगुरू एस.टी. इंगळे उपस्थित राहणार आहेत.संस्थेच्या गौरवशाली इतिहासाचा परिचय देणारी चित्रफीत प्रदर्शित केली जाणार आहे.
यावेळी झालेल्या पत्रकार परिषदेत उपाध्यक्ष अँड. प्रकाश पाटील, डी.टी. पाटील, प्रा. मृणालिनी फडणवीस, शशिकांत वडोदकर आणि प्राचार्य संजय भारंबे उपस्थित होते.
