जळगाव/एरंडोल (ता. २० ऑगस्ट): जळगाव जिल्ह्यातील एरोंडल तालुक्यातील वरखेडी येथील शेताजवळ आज दिनांक २० ऑगस्ट रोजी सकाळी  शॉर्टसर्किट झालेल्या वीज पोलच्या संपर्कात आल्याने दोन महिला, एक पुरुष आणि दोन बालकांचा दुर्दैवी मृत्यू झाला. या दुर्घटनेमुळे गावात शोककळा पसरली असून, महावितरण विभागाच्या दुर्लक्षावर ग्रामस्थांनी तीव्र रोष व्यक्त केला आहे.या दुर्दैवी घटनेने जळगाव जिल्हा हादरला आहे.

कशी घडली घटना

आज सकाळी साडेसातच्या सुमारास काही ग्रामस्थ शेतामध्ये कामासाठी जात असताना ही घटना घडली. म्हसावद रस्त्यालगत असलेल्या शेताच्या कडेला असलेल्या वीज पोलमध्ये शॉर्टसर्किटमुळे करंट पसरला होता. याची कल्पना नसलेल्या एका महिलेचा पाय या करंटच्या संपर्कात आला. तिला वाचवण्यासाठी धावून गेलेल्या इतर चार जणही विजेच्या प्रवाहात अडकले. दुर्दैवाने सर्वांचा घटनास्थळीच मृत्यू झाला.

पाच जणांच्या मृत्यूने हळहळ

या दुर्घटनेत दोन लहान मुले, दोन महिला आणि एक पुरुषाचा समावेश आहे. निष्पाप बालकांचा मृत्यू गावकऱ्यांच्या काळजाला चटका लावणारा ठरला आहे. संपूर्ण गावात हळहळ व्यक्त केली जात असून, मृतांच्या कुटुंबीयांवर दुःखाचा डोंगर कोसळला आहे.

पोलीस घटनास्थळी दाखल

घटनेची माहिती मिळताच एरंडोल पोलिसांनी घटनास्थळी धाव घेतली. मृतदेह ताब्यात घेऊन पंचनामा करण्यात आला असून, शवविच्छेदनासाठी ते रुग्णालयात पाठवण्यात आले आहेत. महावितरण विभागाच्या अधिकाऱ्यांनाही तत्काळ संपर्क करण्यात आला असून, वीज पोलच्या देखभालीतील त्रुटींविषयी चौकशी सुरू करण्यात आली आहे.

ग्रामस्थांचा संताप उसळला

गावकऱ्यांनी महावितरण विभागाच्या ढिसाळ कारभारावर जोरदार निशाणा साधला आहे. “जर वेळच्या वेळी वीज पोलची तपासणी झाली असती, तर आज पाच जीव वाचले असते,” असे ग्रामस्थांचे म्हणणे आहे. दोषींवर कठोर कारवाईची मागणीही करण्यात येत आहे.

गावावर शोककळा:

ही भीषण दुर्घटना गावासाठी अत्यंत दु:खद ठरली आहे. मृतांच्या कुटुंबीयांना आधार देण्यासाठी संपूर्ण गाव एकवटले आहे. गावात सध्या सन्नाटा पसरला असून, प्रत्येकाच्या डोळ्यात अश्रू आहेत.

सरकारी नोकरी कुठे? वाचा –

NIACL Recruitment 2025: न्यू इंडिया ॲश्युरन्स कंपनीत 550 जागांसाठी मेगा भरती; 90,000 रुपये पगाराची संधी

LIC Recruitment 2025: एलआयसीमध्ये ८४१ पदांसाठी भरती सुरू, अर्ज प्रक्रिया जाणून घ्या