जळगाव | प्रतिनिधी जळगाव महानगरपालिका निवडणूक २०२५ साठी भारतीय जनता पक्षाने आमदार मंगेश रमेश चव्हाण यांच्यावर निवडणूक प्रभारी म्हणून महत्त्वपूर्ण जबाबदारी सोपवली आहे. या नियुक्तीबद्दल आमदार चव्हाण यांनी पक्ष नेतृत्वाचे मनःपूर्वक आभार व्यक्त केले आहेत.
आपल्या प्रतिक्रियेत आमदार मंगेश चव्हाण म्हणाले की, ही जबाबदारी केवळ निवडणूक व्यवस्थापनापुरती मर्यादित नसून, भाजपाची विचारधारा, संघटनशक्ती आणि कार्यकर्त्यांचा आत्मविश्वास अधिक बळकट करण्याची मोठी संधी आहे. जळगाव शहराच्या सर्वांगीण विकासासाठी भाजपाचे धोरण तसेच केंद्र व राज्य सरकारच्या लोकाभिमुख योजना प्रभावीपणे नागरिकांपर्यंत पोहोचवण्यासाठी संघटनात्मक ताकदीने काम केले जाईल, असा विश्वास त्यांनी व्यक्त केला.
या विश्वासाबद्दल त्यांनी मुख्यमंत्री मा. देवेंद्रजी फडणवीस, प्रदेशाध्यक्ष मा. रवींद्र चव्हाण तसेच जलसंपदा मंत्री ना. गिरीशभाऊ महाजन यांचे विशेष आभार मानले. त्यांच्या मार्गदर्शनाखाली जिल्हा व शहर पक्ष संघटना, सर्व पदाधिकारी, आजी-माजी लोकप्रतिनिधी तसेच समर्पित कार्यकर्त्यांना सोबत घेऊन जळगाव महानगरपालिकेत भारतीय जनता पक्षाला भक्कम यश मिळवून देण्यासाठी पूर्ण ताकदीने काम करू, असे त्यांनी सांगितले.
पक्ष संघटनेने दाखवलेला विश्वास सार्थ ठरवण्यासाठी शिस्तबद्ध नियोजन, एकजूट आणि सकारात्मक राजकारणाच्या बळावर जळगावच्या विकासासाठी ही निवडणूक लढवली जाईल, असा ठाम विश्वास आमदार मंगेश चव्हाण यांनी व्यक्त केला आहे.
