उपमुख्यमंत्री अजितदादा पवार यांच्या एका आमदाराने थेट राजीनामा देत राष्ट्रवादी काँग्रेस शरद पवार पक्षात जाण्याचा निर्णय घेतल्याने अजितदादा यांना लोकसभा निवडणुकीच्या तोंडावर धक्का मानला जात आहे.
सविस्तर असे की, पारनेरचे आमदार निलेश लंके यांनी आज दिनांक 29 मार्च रोजी अहमदनगर येथील कार्यकर्ता मेळाव्यात विधानसभा सदस्यत्वाचा राजीनामा दिला आहे. यावेळी त्यांनी थेट राष्ट्रवादी काँग्रेस शरदचंद्र पवार पक्षात जाणार असल्याचेही स्पष्ट केले आहे.
सुपा येथे मतदारसंघातील कार्यकर्त्यांच्या बैठकीत निलेश लंके यांनी आपली राजीनामा देत असल्याची घोषणा केली आहे. त्यांनी सांगितले की, मतदार संघातील सर्वांची माफी मागतो, अजित पवारांची माफी मागतो. कारण तुम्ही मला पाच वर्षांसाठी लोकप्रतिनिधी म्हणून निवडून दिलं, पण आपल्याला लोकसभेला सामोरे जायचं असेल तर कठोर निर्णय घ्यावा लागणार आहे. चार महिने शिल्लक असताना काही कटू निर्णय आपल्याला घ्यावे लागणार आहे, असे निलेश लंके म्हणाले.
