जळगाव : जळगावात राष्ट्रवादी काँग्रेसचे अध्यक्ष शरद पवार यांनी भाजपला झटका दिला आहे. शरद पवार यांच्या उपस्थित आज अमळनेरचे माजी आमदार डॉ. बी. एस. पाटील यांनी राष्ट्रवादी काँग्रेसमध्ये प्रवेश केला आहे. डॉ. बी. एस. पाटील यांच्या पक्ष प्रवेशाच्या माध्यमातून शरद पवार यांनी अजित पवार यांच्यासोबत गेलेल्या अनिल पाटील यांच्यासमोर आव्हान उभं करण्याचा प्रयत्न केल्याचं बोललं जात आहे.
आज शरद पवार यांची जळगाव शहरामध्ये स्वाभिमानी सभा पार पडली. या सभेला शरद पवार यांच्यासह राष्ट्रवादीचे प्रदेशाध्यक्ष जयंत पाटील, आमदार एकनाथ खडसे, जितेंद्र आव्हाड, अनिल देशमुख, शशिकांत शिंदे, विद्याताई चव्हाण आणि रोहिणी खडसे उपस्थित आहेत. या सभेदरम्यान, भाजपचे माजी आमदार डॉ.बी.एस.पाटील यांनी राष्ट्रवादीत प्रवेश केला आहे.
अनिल भाईदास पाटील यांचे राजकीय गुरू डॉ.बी.एस.पाटील यांचा राष्ट्रवादी शरद पवार गटात प्रवेश झाल्यानं भाजपला मोठा धक्का बसला आहे. नवीन विचारसरणी आवडत नाही त्यामुळे भाजप सोडत असून राष्ट्रवादीत प्रवेश करत असल्याचं पाटील म्हणाले. दोन वेळा डॉ.बी.एस.पाटील हे अमळनेर मतदार संघात आमदार होते. शिक्षक दिनाच्या दिवशी डॉ.बी.एस.पाटील यांनी त्यांचे शिष्य अनिल भाईदास पाटील यांना धक्का बसला आहे.
डॉ. बी. एस. पाटील हे अमळनेरमधून तीन वेळा विजयी झाले होते. १९९५ पासून ते भाजपच्या तिकिटावर आमदार होते. भाजपनं तिकीट नाकारल्यानं ते अपक्ष लढले होते. त्यानंतर ते काँग्रेसमध्ये गेले होते. डॉ. बी.एस. पाटील पुन्हा एकनाथ खडसे यांच्या उपस्थितीत भाजपमध्ये गेले होते. डॉ. बी. एस. पाटील यांच्या उमेदवारीमुळं अनिल पाटील यांना पराभव स्वीकारावा लागला होता. आता डॉ. बी. एस. पाटील राष्ट्रवादी काँग्रेसमध्ये दाखल झाल्यानं अनिल पाटील यांच्यापुढं आव्हान निर्माण होणार आहे.
