जळगाव,(प्रतिनिधी)- राष्ट्रवादी काँग्रेसचे अध्यक्ष खासदार शरद पवार आज मंगळवार दि.५ रोजी जळगाव जिल्हा दौऱ्यावर असून जळगाव शहरातील सागर पार्कवर भव्य जाहीर सभा दुपारी १:३० वाजता होणार आहे.दरम्यान सभेच्या आधी ते महापौर जयश्री महाजन यांच्या निवासस्थानी भेट देणार आहेत.
राष्ट्रवादीत फूट पडल्यानंतर खासदार शरद पवार यांची जळगाव जिल्ह्यात पहिलीच सभा होणार आहे. त्यामुळे खा. शरद पवार आजच्या सभेत काय बोलतील याकडे सर्वांचे लक्ष लागून आहे.जिल्हा राष्ट्रवादीकडून राज्यातील आतापर्यंतच्या सर्व सभांपेक्षा जळगावची सभा सर्वात मोठी ठरावी यासाठी नियोजन केले जात आहे.
खासदार पवार यांचा मिनिट टू मिनिट दौरा असा
खासदार पवार यांचा मिनिट टू मिनिट दौरा प्रशासनाला प्राप्त झाला आहे. ते मुंबईहून सकाळी ९:५० वाजता जळगाव विमानतळावर येणार आहेत. तेथून १० वाजता जळगाव शहरात येण्यासाठी निघतील. १० : १५ ते १० : ३० दरम्यान मेहरूण येथे महापौर जयश्री महाजन यांच्या निवासस्थानी भेट देतील. त्यापुढील वेळ हा जैन हिल्स या ठिकाणी राखीव ठेवण्यात आला आहे.
दुपारी दीड ते साडेचार वाजेपर्यंत खासदार पवार यांच्या प्रमुख उपस्थितीत सागर पार्कवर सभा होईल. सभा संपल्यानंतर पाच वाजता ते जळगाव विमानतळावरून मुंबईसाठी रवाना होतील. सभेच्या पार्श्वभूमीवर राष्ट्रवादीचे आमदार रोहित पवार दोन दिवसांपासून जळगाव जिल्ह्यात असून, विविध भागात दौरे, जनतेशी संवाद आणि सभा घेत आहेत. वातावरण निर्मितीसाठी पक्षाकडून पुरेपूर प्रयत्न केले जात आहेत.
