जळगाव,(प्रतिनिधी)- फैजपूर सतत आजारी राहणाऱ्या पोटच्या पाचवर्षीय मुलीला जन्मदात्या बापानेच विहिरीत फेकून जीव घेतल्याची हृदयद्रावक घटना न्हावी (ता. यावल) येथे रविवारी उघडकीस आली. पोलिसांनी मुलीची हत्या करणाऱ्या बापाला अटक केली असून खुनाचा गुन्हा दाखल केला आहे.अनिता बारेला (वय ५) असे मृत बालिकेचे, तर ठुशा भावलाल बारेला(३०, रा. गुलझरी, मध्य प्रदेश, ह.मु. न्हावी, ता. यावल) असे अटक करण्यात आलेल्या बापाचे नाव आहे.
न्हावी येथील धीरज सुधाकर चौधरी यांच्या शेतात बारेला कुटुंब वास्तव्याला आहे. गुरुवारपासून (दि. १७) ठुशा बरेला व त्याची पाचवर्षीय मुलगी अनिता हे बेपत्ता होते. रविवारी दुपारी शेतातील विहिरीत अनिता हिचा मृतदेह तरंगताना आढळला.या प्रकरणी प्रथमदर्शनी अकस्मात मृत्यूची नोंद करण्यात आली होती.
परंतु, अनिता हिचा मृतदेह आढळल्यानंतर तिचे वडील बेपत्ता होते. त्यामुळे पोलिसांना संशय आला. ठुशा यास गुलझेरी येथून ताब्यात घेण्यात आले आणि खाक्या दाखवतात त्याने गुन्ह्याची कबुली दिली. अनिता ही कायम आजारी असायची. त्यामुळे पत्नीही वारंवार तिला दवाखान्यात नेण्यासाठी आग्रह धरायची. त्याचाच राग येऊन आपण हे कृत्य केल्याचे त्याने पोलिसांना सांगितलं.
