नवी दिल्लीः- संसदेच्या कॅन्टीनमधील खासदारांना स्वस्तात मिळणारे जेवण आता महाग होण्याची शक्यता आहे. खासदारांना जेवणावर मिळणारी सबसिडी रद्द होणार असल्याची माहिती आहे. संसदेतील खासदारांना जेवणावर जी सूट मिळत होती ती लवकरच रद्द करण्यात येणार असल्याची शक्यता आहे. ही सूट रद्द झाल्यास आता खासदारांना कॅन्टिनमधील दरांप्रमाणे पैसे मोजावे लागणार आहेत.
लोकसभेचे अध्यक्ष ओम बिरला यांनी यासंदर्भात सूचना केल्यानंतर बिझनेस अॅडवायझरी कमिटीने या मुद्द्यांवर चर्चा केली होती. विशेष म्हणजे, सर्व पक्षांच्या खासदारांनी या मुद्दयांवर सहमती दर्शवली आहे. संसदेच्या कॅन्टिनमधील सबसिडी हटविण्यात आल्यानंतर केंद्र सरकारची दरवर्षी १७ कोटी रुपयांची बचत होणार आहे. खासदारांना मिळणाऱ्या स्वस्तातील जेवणावरून याआधी खूप वेळा वाद झाला होता. त्यामुळे गेल्या लोकसभेत कॅन्टिनमधील जेवणाचे दर वाढवण्यात आले होते. तसेच सबसिडीचे बिल कमी करण्यात आले होते. परंतु, आता संपूर्ण सबसिडी हटवण्याची तयारी सुरू करण्यात आली आहे. खासदारांना भरमसाठ सुविधा मिळत असताना त्यांना मानधन मिळत असताना संसदेच्या कॅन्टिनमध्ये स्वस्तात जेवण कशाला हवे आहे, असा प्रश्न विचारून संसदेच्या कॅन्टिनमध्ये मिळणाऱ्या सबसिडीवरून अनेकदा वाद निर्माण झाले आहेत. देशात महागाई वाढल्यानंतर संसद कॅन्टिनमधील दरपत्रक सोशल मीडियावर अनेकदा व्हायरल झालेले आहेत. सबसिडी मिळत असल्याने देशातील खासदारांना संसद कॅन्टिनमधील जेवण खूपच स्वस्त मिळत आहे. त्यामुळे महागाईने होरपळलेल्या सर्वसामान्य नागरिकांत खासदारांविरोधात संतापाची लाट उसळली होती.
