‘या’ आठवड्यात चक्रीवादळ येऊ शकते, हवामान खात्याने दिला इशारा

नवी दिल्ली : मान्सूनपूर्व सरींनी गेल्या दोन दिवसांत देशातील अनेक भागांत तापमानात झाली आहे. त्यामुळे नागरिकांना उकाड्यापासून काहीसा दिलासा मिळत आहे. मात्र आता चक्रीवादळाचा धोका निर्माण झाला आहे. हवामान खात्यानुसार, या आठवड्याच्या अखेरीस दक्षिण अंदमान समुद्रावर कमी दाबाचे क्षेत्र तयार होण्याची शक्यता आहे. नंतर त्याचे चक्री वादळात रूपांतर होऊ शकते. अशा स्थितीत दक्षिण अंदमान समुद्र आणि लगतच्या आग्नेय बंगालच्या उपसागरात जोरदार वारे वाहण्याची शक्यता आहे.

एएनआय या वृत्तसंस्थेशी बोलताना, आयएमडीचे वरिष्ठ शास्त्रज्ञ उमाशंकर दास यांनी भुवनेश्वरमध्ये सांगितले की, ६ मेच्या आसपास दक्षिण अंदमान समुद्रात कमी दाबाचे क्षेत्र तयार होईल. नंतर, कमी दाबाचे क्षेत्र उत्तर-पश्चिम दिशेला सरकेल आणि ४८ तासांनंतर खोल दाबामध्ये रुपांतरित होईल.

वारा 75 किमी प्रतितास वेगाने वाहू शकतो
कमी दाबाच्या क्षेत्रामुळे, पुढील 2-3 दिवसांत अंदमान आणि निकोबार बेटांवर मध्यम ते जोरदार पावसाची शक्यता आहे. उमाशंकर दास यांच्या मते बंगालच्या उपसागरात आणि दक्षिण अंदमान समुद्रात जोरदार वाऱ्यासह पाऊस पडू शकतो. ते म्हणाले, ‘या काळात वाऱ्याचा वेग सुमारे 40-50 किमी प्रतितास असू शकतो. जे नंतर 75 किमी प्रतितास पर्यंत पोहोचू शकते. मच्छिमारांना अंदमान सागरी क्षेत्र आणि आग्नेय बंगालच्या उपसागरात जाऊ नये असा सल्ला देण्यात आला आहे.

देशाच्या या भागात पावसाची शक्यता
स्कायमेट हवामानानुसार, पंजाब, हरियाणा, उत्तर राजस्थान, दिल्ली आणि पश्चिम उत्तर प्रदेशच्या काही भागात हलका पाऊस आणि मेघगर्जनेसह पाऊस पडण्याची शक्यता आहे. हवामान खात्याच्या म्हणण्यानुसार, जम्मू-काश्मीर, मुझफ्फराबाद, हिमाचल प्रदेश, उत्तराखंड, पूर्व उत्तर प्रदेश, बिहार, झारखंड, छत्तीसगड, कर्नाटक, रायलसीमा, किनारपट्टी कर्नाटक आणि तेलंगणाच्या काही भागात पाऊस पडू शकतो.

उत्तर प्रदेशात हवामान बदलले
उत्तर प्रदेशातील अनेक भागात बुधवारी सायंकाळी उशिरा वातावरणात बदल झाला आणि सोसाट्याचा वारा आणि वादळ-पाणी यामुळे लोकांना उष्णतेपासून दिलासा मिळाला. लखनौ स्थित हवामान केंद्राचे संचालक जेपी गुप्ता यांनी ‘पीटीआय’ वृत्तसंस्थेला सांगितले की, संध्याकाळी उशिरा राज्याच्या अनेक पश्चिम आणि काही पूर्व भागात जोरदार वादळ आणि हलका पाऊस पडला. आग्नेय वाऱ्यांमुळे हवामानात हा बदल झाल्याचे त्यांनी सांगितले. पुढील तीन-चार दिवस राज्यात असेच वातावरण राहण्याची शक्यता आहे.