जळगाव, (प्रतिनिधी) – कुऱ्हा काकोडा येथील कार्यक्रमात एकनाथराव खडसे बोलत असतांना खाली बसलेल्या कार्यकर्त्यांमधून आवाज आला.. त्या ‘सीडी’ चं काय?. एकनाथराव खडसे यांनी राष्ट्रवादी काँग्रेस पक्षात प्रवेश करतेवेळी म्हटलं होतं की, माझ्या मागे ईडी लावली तर मी ‘सीडी’ लावीन… या वक्तव्याने संपूर्ण राज्याच्या राजकारणात खळबळ उडाली होती. दरम्यान आज त्या सीडीबाबत कार्यकर्त्यानेच विचारलं की त्या ‘सीडी’चं काय? त्यावर खडसे बोलतांना म्हणाले की, ‘सीडी’ तर थोडक्यानं हटकली…याबाबत पोलिसांकडून चौकशी सुरु आहे, मी ‘सीडी’ दिली नाही तरी सर्वाना माहिती आहे की ती सीडी कुणाची आहे… यावर कार्यकर्त्यांनी देखील होकार भरला.
पुढे बोलतांना एकनाथराव खडसे म्हणाले की, ‘ईडी’ माध्यमातून नाहक त्रास दिला… ईडी च्या चार्जशीट मध्ये इतकं खोटं आहे की विचारूच नका, कधी इनकमटॅक्स तर कधी अँटिकरप्शन माझ्या मागे लावून त्रास दिला पण मी पुरून उरलो. नाथाभाऊला ‘तुरुंगात’ टाकण्यासाठी गल्लीपासून तर दिल्ली पर्यंत प्रयत्न सुरु असल्याचं माजी महसूल मंत्री एकनाथराव खडसे यांनी आज कुऱ्हा काकोडा येथील कार्यक्रमात सांगून टाकलं.
आ.गिरीश महाजन म्हणतात की माझ्याकडे नाथाभाऊंचे शंभर उतारे आहे… मी त्यांना सांगू इच्छितो की एकही प्रॉपर्टी बेकायदेशीर आढळली तर ती दान करून टाकेल. तब्बल चाळीस वर्ष भाजप पक्ष वाढविण्यासाठी मी कष्ट केले, मला हे झाले नाहीत तर हे तुम्हाला काय होतील, त्यामुळे हाजी हाजी करू नका असा सल्लाही त्यांनी भाजप मध्ये असलेल्यानां यावेळी दिला.
गिरीश महाजन यांनी दोन तीन दिवसापूर्वीच खडसेनां उद्देशून म्हटलं होतं की सरकार आपलं आहे, वजन वापरून आपण माझ्या बेनामी संपत्तीची चौकशी लावावी त्यावर आज एकनाथ खडसेनीं प्रतिउत्तर देत चौकशी सुरु असल्याचं म्हटलं आहे.
