बोदवड, (प्रतिनिधी)- ज्याचा बाप ‘मास्तर’ होता त्यानं हजार बाराशे कोटीची मालमत्ता जमवली… त्यांची चौकशी होतं नाही आणि मी बीएचआरच्या ठेवीदारांचा प्रश्न उचलला म्हणून मला ‘ईडी’ माध्यमातून नाहक त्रास दिला जात असल्याचा घणाघात माजी महसूल मंत्री एकनाथराव खडसे यांनी आज बोदवड येथील एका कार्यक्रमात केला.
गेल्या काही दिवसांपासून माजी मंत्री यांच्यावरील ईडी ची कारवाई बाबतचा मुद्दा चर्चेत आहे.तीन दिवसापूर्वी देखील एकनाथ खडसे यांच्यावर ईडीने कारवाई केल्याचे सोशल मीडियातून समोर आले होते त्यावर खडसे यांच्या कन्या रोहिणी खडसे यांनी कुठलीच कारवाई झाली नसल्याचं म्हटलं होतं.
दरम्यान आज एकनाथ खडसे यांनी बोदवड येथील एका कार्यक्रमाला उपस्थिती दिली त्यावेळी ते बोलत होते.पुढे बोलतांना ते म्हणाले की, आपण कधीही भाड्याच्या घरात नव्हतो, ज्यांनी भाड्याच्या घरात दिवस काढले त्यांची हजार बाराशे कोटीची मालमत्ता कशी असा प्रश्न उपस्थित केला. आपण फक्त बिएचआर बाबत आवाज उठवला म्हणून आपल्यावर ईडीची कारवाई करण्यात आल्याचा आरोप खडसे यांनी याप्रसंगी केला.
