जळगाव, (प्रतिनिधी)-कवयत्री बहिणाबाई चौधरी उत्तर महाराष्ट्र विद्यापीठाच्या इंग्रजी अभ्यास मंडळासह विविध समितींवर कार्यरत असलेले नूतन मराठा महाविद्यालये प्राध्यापक डॉ.अविनाश बडगुजर यांनी कला शाखेच्या प्रथम वर्षाचे इंग्रजीचे पुस्तक “Reading Literature” हे संकलीत व प्रकाशीत केले. मात्र हे पुस्तक त्यांनी उघडपणे व बिनबोभाटपणे वाङमयचौर्य करत कॉपी पेस्ट चा रट्टा मारत व इंटरनेट वरून घेत पुस्तकं तयार केल्याचं स्पष्ट होत असल्याचा गंभीर आरोप राष्ट्रवादी काँग्रेसचे महानगर सचिव ऍड. कुणाल पवार यांनी केला आहे.यामुळे शैक्षणिक क्षेत्रात खळबळ उडेल हे मात्र खरं आहे.
ऍड. कुणाल पवार यांनी केलेल्या आरोपात म्हटलं आहे कि, डॉ.अविनाश बडगुजर यांनी “Literary Forms, Trends and Movements (Rama Brothers) या पुस्तकातुन पान क्र. 28 ते 41 हि पाने जशीच्या तशी ‘कॉपी पेस्ट’ केलेली आहेत. तसेच इतरही अनेक पानेची पाने इंटरनेटवरुन उचललेली दिसतात.
याप्रकरणी कुलगुरु यांच्या कडे तक्रार केली गेली असुन एक तज्ञ चौकशी समितीसुध्दा गठीत झाली आहे. परंतु गेल्या आठ महिन्यांपासुन कोव्हीडचं कारण पुढे करुन या समितीचे प्रत्यक्ष काम अजुन सुरु झाले नसल्याचे समजते.या प्रकरणात कायदेशीर कारवाई करण्यासाठी टाळाटाळ होतं असल्याने अनेक प्रश्न उपस्थित होतं असल्याने काहीतरी आर्थिक देवाण घेवाण तर झाली नसावी असाही संशय बळावला आहे.
डॉ.अविनाश बडगुजर हे स्वतः पीएच.डी.धारक असुन ते इंग्रजी विषयामध्ये पीएच.डी.चे मार्गदर्शकसुध्दा आहेत. मात्र ‘विद्याचवाचस्पती’ सारख्या सर्वोच्च पदवीचे मार्गदर्शकच जर ‘वाङमयचौर्य’ करित असतील तर त्यांचे स्वतःचे संशोधन व त्यांचे मार्गदर्शनाखाली होणारे इंग्रजी भाषा व साहित्याचे संशोधन यावर मोठे प्रश्नचिन्ह उभे राहते. अशा शिक्षकांचा व मार्गदर्शकांचा त्यांचे विद्यार्थी काय धडा घेणार व संशोधनाचा काय दर्जा राखल्या जाणार असे अनेक प्रश्न यानिमित्ताने पुढे येत आहे.
परंतु वाङमयचौर्यासारख्या गंभीर बाबीची चौकशी हि संबधीत दोन पुस्तकांचा अभ्यास करुन आॉनलाईन पध्दतीनेसुध्दा अहवाल सादर केल्या जाऊ शकतो व पुढील कार्यवाही विद्यापीठ प्रशासनाला करता येऊ शकते. मात्र या सर्व बाबी प्रशासनाच्या व प्रशासन चालविणाऱ्या अधिकाऱ्यांच्या इच्छाशक्तिवर व कार्यक्षमतेवर अवलंबुन आहे. या वाङमयचौर्याचासुध्दा विद्यापीठाच्या इतर अनेक घोटाळ्यांसारखा पर्दाफाश होईल का नाही याबाबत सर्वंनाच शंका वाटत आहे. तसेच अश्या प्रकारचे गंभीर आरोप असणाऱ्या मार्गदर्शक यांच्या मार्गदर्शनाखाली होत असलेल्या सर्व पीएचडी च्या पदवी रद्द करण्यात याव्यात अशी मागणी देखील ऍड. कुणाल पवार यांनी केली आहे.
