जळगाव : पायी घरी जाणाऱ्या महिलेच्या गळ्यातील सोन्याचे मंगळसुत्र जबरी हिसकावून चोरून नेले. शहरातील नुमान कॉलनी परिसरात सोमवार, २९ रोजी रात्री ८ वाजेच्या सुमारास ही घटना घडली. याप्रकरणी रामानंद नगर पोलीस ठाण्यात अज्ञात दोन जणांविरोधात गुन्हा दाखल करण्यात आला आहे.
पोलीस सूत्रानुसार, शहरातील अभियंता कॉलनीतील रहिवासी रुची लक्ष्मी काबरा (४५) या सोमवार, २९ रोजी ८ वाजता शहरातील हनुमान कॉलनी परिसरातून पायी जात होत्या. त्याचवेळी दुचाकीवरून आलेल्या दोन भामट्यांनी त्यांच्या गळ्यातील २६ हजार रुपये किमतीची साडे चार ग्रॅम वजनाची सोन्याची चैन, ४७ हजार रुपये किमतीची आठ ग्रॅम वजनाची मणी, मंगळसूत्र असलेली पोत असा एकूण ७४ हजार रुपये किमतीचा मुद्देमाल ओढून नेला.
ही घटना घडल्यानंतर त्यांनी आरडाओरड केली मात्र, तोपर्यंत दोन्ही अज्ञात भामटे पसार झाले होते. या प्रकरणी रामानंद नगर पोलीस ठाण्यात तक्रार दिली. त्यानुसार रामानंद नगर पोलीस ठाण्यात अज्ञात दोन जणांविरोधात गुन्हा दाखल करण्यात आला आहे. पुढील तपास सपोनि रोहिलास गभाले करत आहेत.
