जळगाव : एरंडोल – पारोळा विधानसभा मतदारसंघाचे शिवसेना शिंदे गटाचे आमदार चिमणराव पाटील यांच्या वाहनाचा अपघात झाल्याचे समोर आले आहे. तर त्यांच्या वाहनाला त्यांच्याच पोलिस ताफ्यातील एका पोलीस व्हॅनची मागून धडक बसल्याने हा अपघात झाला. या अपघातात शिंदे गटाचे आमदार किरकोळ जखमी झाले आहेत.
मिळालेल्या माहितीनुसार, पारोळा मतदारसंघाचे आमदार चिमणराव पाटील हे त्यांच्या खाजगी वाहनाने चोपडा येथे कामानिमित्त जात होते. त्यांना पुरवण्यात आलेल्या ताफ्यातील पोलीस सुरक्षा वाहनाने अमळनेर -चोपडा रस्त्यावरील सिंधी कॉलनीजवळ आमदारांच्या वाहनाला मागून जोरदार धडक दिल्याने अपघात झाला.
या अपघातात आमदार पाटील किरकोळ जखमी झाले आहेत. सुदैवाने गंभीर दुखापत झालेली नाही. मात्र पोलीस व्हॅन आणि चिमणराव पाटलांच्या कारचं मोठं नुकसान झाले आहे.
