नवी दिल्ली । गेल्या काही दिवसांपासून टोमॅटोच्या किमतीत झालेली मोठी वाढ हे हवामानातील बदलामुळे सरकारचे म्हणणे आहे. टोमॅटोचे दर लवकरच कमी होतील, असे सरकारकडून सांगण्यात आले. देशातील अनेक शहरांमध्ये टोमॅटो १०० रुपये किंवा त्याहून अधिक दराने विकल्या जात असल्याच्या बातम्या आहेत. त्यामुळेच मुख्यतः स्वयंपाकात वापरल्या जाणार्‍या टोमॅटोने घरांचं बजेट बिघडवलं आहे.
ग्राहक व्यवहार विभागाचे सचिव रोहित कुमार सिंग म्हणाले की, टोमॅटोच्या किमतीत झालेली वाढ ही तात्पुरती समस्या आहे. ते म्हणाले, ‘दरवर्षी या वेळी असे घडते. वास्तविक टोमॅटो हे अतिशय नाशवंत अन्नपदार्थ असून अचानक आलेल्या पावसामुळे त्याच्या वाहतुकीवर परिणाम होतो. ग्राहक व्यवहार विभागाकडे उपलब्ध असलेल्या आकडेवारीनुसार, 27 जून रोजी अखिल भारतीय पातळीवर टोमॅटोची सरासरी किंमत 46 रुपये प्रति किलो होती.
कमाल भाव 122 रुपये प्रति किलो
टोमॅटोचा कमाल भावही 122 रुपये प्रतिकिलो झाला आहे. देशातील चार मेट्रो शहरांबद्दल बोलायचे झाले तर टोमॅटोची किरकोळ किंमत दिल्लीत 60 रुपये प्रति किलो, मुंबईत 42 रुपये, कोलकात्यात 75 रुपये आणि चेन्नईमध्ये 67 रुपये प्रति किलो होती. यूपीमधील गोरखपूर आणि कर्नाटकातील बेल्लारी येथे टोमॅटोची किंमत 122 रुपये प्रतिकिलो असल्याचे सरकारी आकडेवारी सांगते.
टोमॅटोचे दर आठवडाभरात दुपटीने वाढले
दिल्ली-एनसीआरमध्ये, दूध आणि फळे आणि भाज्या विकणाऱ्या मदर डेअरीच्या दुकानातही टोमॅटोचे दर दुप्पट होऊन सुमारे 80 रुपये किलो झाले आहेत. प्रमुख उत्पादक भागात पावसामुळे टोमॅटोचा पुरवठा विस्कळीत झाल्याने त्याच्या भावात वाढ झाली आहे. मदर डेअरीच्या प्रवक्त्याने सांगितले की, “मान्सून सुरू झाल्यामुळे टोमॅटोचे पीक सध्या हंगामी बदलांमधून जात आहे. हिमाचल प्रदेश आणि उत्तराखंडमध्ये झालेल्या पावसामुळे टोमॅटो पिकावर परिणाम झाला असून मागणीच्या तुलनेत त्याचा पुरवठाही कमी झाला आहे.
