नवापूर : एक धक्कादायक घटना समोर आलीय. नवविवाहित दाम्पत्याने रेल्वेखाली आत्महत्येनंतर वडिलांनीही टोकाचं पाऊल उचललं. वडिलांनीही रेल्वेखाली झोकून देत आत्महत्या केल्याची घटना शहरातील फुलफळी या भागात घडली. सावन सय्यद गावित त्याची पत्नी रोशनी सावन गावित आणि वडील सय्यद कर्मा गावित(रा. तिनटेंबा, नवापूर) असं मृतांचे नाव आहे.
पोलिसांकडून मिळालेल्या माहितीनूसार सय्यद गावित व मुलगा सावन हे मोलमजुरी करून आपल्या परिवाराचा उदरनिर्वाह करत होते.सावन आणि रोशनी यांचा नुकताच २२ फेब्रुवारी २०२३ रोजी विवाह झाला होता. लग्नाला तीन महिने होत नाही तोच ही दुर्दैवी घटना समोर आली आहे. सावन याने वडिलांकडे नव्या मोटारसायकलची मागणी केली. मात्र, वडिलांनी ती खरेदी करण्यास नकार दिला होता. त्यावरून घरात दोघांमध्ये किरकोळ वाद निर्माण झाले.
रागाच्याभरात सावन आणि रोशनी यांनी टोकाचे पाऊल उचलत सोमवारी रात्री फुलफळी भागातील रेल्वे रुळावर स्वत:ला रेल्वेखाली झोकून देत आत्महत्या केली. ही घटना वडील सय्यद यांना कळताच ते भावनाविवश झाले. मुलगा आणि सून यांचा विरह सहन न झाल्यामुळे त्यांनीही रेल्वेखाली झोकून देत आपले जीवनयात्रा संपवली.
चार बहिणीचा तो एकुलता एक भाऊ होता. चौघा बहिणींचा विवाह झाला असून कुटुंबप्रमुख आपले वडील, चार बहिणींचा एकुलता भाऊ व नवविवाहित भावजयी यांचा असा दुर्दैवी अंत झाल्याने कुटुंबावर दु:खाचा डोंगर कोसळला.
