माझ्यासोबत प्रेमसंबंध ठेव, नाहीतर ..वारंवारच्या धमकीने १७ वर्षीय मुलीची आत्महत्या, ११ दिवसानंतर तरुणावर गुन्हा

जळगाव:  पहूर पोलीस स्टेशन हद्दीतील एका गावात १७ वर्षीय मुलीने आत्महत्या केल्याची घटना उघडकीस आली होती. दरम्यान, मुलीचे  तरुणासोबत प्रेमसंबंध होते. प्रेमसंबंधाबाबची माहिती नातेवाईकांना मिळाल्यानंतर त्यांनी मुलीची समजूत घातली, त्यानंतर मुलगी आणि तरुणामधील प्रेमसंबंध तुटले. मात्र, तेव्हा तरुणाने अल्पवयीन मुलीला फोटो व्हायरल करण्याची धमकी दिली.वारंवारच्या या धमकीमुळे या मुलीने आत्महत्या केल्याची बाब समोर आली असून याप्रकरणी पहूर पोलीस ठाण्यात अकरा दिवसानंतर मुलीला आत्महत्येस प्रवृत्त केल्याप्रकरणी २३ वर्षीय तरुणाविरोधात गुन्हा दाखल करण्यात आला आहे.

याबाबत अधिक असे की, पहूर पोलीस स्टेशन हद्दीतील एका गावात १७ वर्षीय अल्पवयीन मुलगी तिच्या कुटुंबासह वास्तव्यास होती. काही दिवसांपूर्वी मुलीची २३ वर्षीय तरुणासोबत ओळखी झाली. या ओळखीतून दोघांमध्ये प्रेमाचे सूत जुळले. एकेदिवशी मुलगी तरुणासोबत फोनवर बोलत असताना नातेवाईकांना हा प्रकार लक्षात आला. नातेवाईकांनी मुलीला विश्वासात घेवून नेमका प्रकार काय आहे, याबाबत विचारले असता, मुलीचे तरुणासोबत प्रेमसंबंध असल्याचे समोर आले. मुलगी ही अल्पवयीन असल्याने तसेच गावात बदनामी होईल म्हणून नातेवाईकांनी मुलीची समजूत घातली, त्यानंतर मुलगी आणि तरुणामधील प्रेमसंबंध तुटले.

 हे पण वाचा..

प्रवाशांसाठी खुशखबर! पुणे-अमरावती विशेष गाडी धावणार, ‘या’ स्टेशनवर थांबणार?

ISRO : भारतीय स्पेस रिसर्च ऑर्गनायझेशन 10वी, ITI उत्तीर्णांना नोकरी मिळविण्याची संधी..

शेतकऱ्याचा भन्नाट जुगाड! काही मिनिटांत केली गव्हाची कापणी, Video होतोय तुफान व्हायरल

नातेवाईक तसेच कुटुंबियांना प्रकार माहिती पडल्यानंतर मुलीने तरुणास प्रेमसंबंध ठेवण्यास नकार दिला. मात्र, यानंतर तरुण हा प्रेमसंबंध ठेवण्यासाठी मुलीला आग्रह करत होता. प्रेमसंबंध तोडले तर माझ्यासोबतचे तुझे फोटो सोशल मिडीयावर व्हायरल करेन, अशी धमकीही संशयित तरुण मुलीला वारंवार देत होता. तरुणाकडून धमकी देत वारंवारचा त्रास आणि बदनामीच्या भितीने २९ मार्च रोजी मुलीने गळफास घेवून आत्महत्या केली होती.

याप्रकरणी सुरुवातीला पहूर पोलीस ठाण्यात अकस्मात मृत्यूची नोंद करण्यात आली होती. पोलिसांनी केलेल्या चौकशीअंती, अकरा दिवसानंतर शुक्रवारी सायंकाळी याप्रकरणी तरुणाविरोधात पहूर पोलीस ठाण्यात आत्महत्येस प्रवृत्त केल्याप्रकरणी गुन्हा दाखल करण्यात आला आहे. घटनेचा पुढील तपास पोलीस उपनिरीक्षक संजय बनसोड करीत आहेत.