बेल्लारी : कर्नाटकातील बेल्लारी येथील कुडाठिणी शहरातून एक धक्कादायक घटना समोर आलीय. मुलीचे दुसऱ्या समाजातील मुलासोबत असलेल्या प्रेमसंबंधामुळे नाराज पित्याने स्वतःच्या मुलीला कालव्यात ढकलून तिची हत्या केली. ओमकार गौडा असे आरोपी पित्याचे नाव असून पोलिसांनी त्याला अटक केली आहे. मात्र या घटनेने परिसरात मोठी खळबळ उडाली आहे.
नेमकी काय आहे घटना?
ओमकार गौडा यांच्या मुलीचे दुसऱ्या समाजातील मुलासोबत प्रेमसंबंध सुरु होते. याची माहिती मिळताच ओमकार यांनी आपल्या मुलीला हे प्रेमसंबंध तोडण्यासाठी समजावले होते. मात्र मुलगी ऐकायला तयार नव्हती. यामुळे ओमकार याचा संताप झाला होता. संतापलेल्या ओमकार याने मुलीच्या हत्येचा कट रचला. यासाठी ते आधी 31 ऑक्टोबर रोजी मुलीला चित्रपट पहायला घेऊन गेले. चित्रपट पाहिल्यानंतर शॉपिंगला नेले. त्यानंतर ज्वेलरी दुकानात जाऊन दागिने खरेदी केले.
सर्व शॉपिंग आटोपल्यानंतर दोघे घरी परतत होते. घरी परतत असताना ओमकारने वाटेत एचएलसी कॅनॉलजवळ कार थांबवली आणि मुलीला गाडीतून बाहेर यायला सांगितले. वडिलांच्या हेतूपासून मुलगी अनभिज्ञ होती.
मुलगीही काहीही विचार न करता गाडीतून खाली उतरली. त्यानंतर निर्दयी बापाने तिला मागून धक्का देत कालव्यात ढकलले. कालव्यात बुडून मुलीचा मृत्यू झाला. त्यानंतर बाप घरी न जाता तिरुपतीला पळून गेला. पोलीस चौकशी होताच आरोपी भांबावला आणि मुलीच्या हत्येची माहिती पोलिसांना दिली. पोलिसांनी आरोपीविरुद्ध खुनाचा गुन्हा दाखल करून त्याला अटक केली आहे. मुलीच्या मृतदेहाचा कालव्यात शोध घेण्यात येत आहे.
