जळगाव : राज्यात खून, आत्महत्या आणि गुन्ह्यांच्या घटना वाढत असताना जळगावमध्ये काळजाचा ठोका चुकावणारी एक घटना समोर आली आहे. शहरातील ईश्वर कॉलनीत १६ वर्षीय अल्पवयीन मुलीने राहत्या घरात गळफास घेवून आत्महत्या केल्याची घटना उघडकीला आली आहे. आत्महत्या करण्याचे कारण समजू शकले नाही. या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
नेमकी काय आहे घटना?
जळगाव शहरातील ईश्वर कॉलनीत अल्पवयीन मुलगी आपल्या परिवारासह वास्तव्याला होती. वडील धान्य मार्केट दुकानात दलालीचे काम करून उदरनिर्वाह करतात. शुक्रवारी १२ जानेवारी रोजी सकाळी वडील कामाला निघून गेले. मुलगी ही आईसोबत घरी होती. दुपारी २ वाजेच्या सुमारास आई गायीला पाणी पाजण्यासाठी घरातून बाहेर गेली. तितक्यात घरात एकटे असल्याची संधी साधत मुलीने गळफास घेवून जीवन संपविले.
आई घरात आल्यानंतर तिला मुलीने गळफास घेतल्याचे दिसून आले. मुलीला पाहताच आईने एकच हंबरडा फोडला होता. शेजारी राहणाऱ्या नागरीकांच्या मदतीने खाली उतरवून जिल्हा शासकीय वैद्यकीय महाविद्यालयात दाखल केले असता वैद्यकीय अधिकारी यांनी मयत घोषित केले. या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे. पुढील तपास पोलीस नाईक सुनील सोनार हे करीत आहेत.
