पुणे : पुण्यात गुन्हेगारीच्या घटनांमध्ये मोठ्या प्रमाणावर वाढ झाली आहे. त्यात गांजाची विक्रीचे प्रमाणही वाढल्याचे पोलिसांच्या कारवाईवरून दिसत आहे. सहज होणारी उपलब्धता आणि कमी किंमत यामुळे अनेक जण याकडे वळू लागले आहे. त्यामुळे अंमली पदार्थ विरोधी पथकाकडून धडक कारवाई केली जात आहे. या पथकाने लोणी काळभोर पोलीस स्टेशनच्या हद्दीतून सासु-सुनांना अटक केली असून, त्यांच्या झडतीतून धक्कादायक प्रकार समोर आला आहे.
पोलिसांनी दिलेल्या माहितीनुसार, अंमली पदार्थ विरोधी पथकाचे कर्मचारी लोणी काळभोर पोलीस स्टेशनच्या हद्दीत पेट्रोलिंग करत होते. यावेळी त्यांना दोन महिला आपल्या डोक्यावर नायलॉनच्या पांढऱ्या रंगाच्या पिशव्यांचे सुतळीने बांधलेल्या पिशव्या घेऊन जाताना दिसल्या. या महिलांच्या संशयास्पद हालचाली पाहता पोलिसांना त्यांच्यावर संशय आला. पोलिसांनी दोघींनाही बाजूला घेऊन विचारपूस केली असता दोघी सासु-सुना असल्याचे निष्पन्न झाले. त्यांच्या डोक्यावर असणाऱ्या पिशव्यांची तपासणी केली असता तर पोलिसांना धक्काच बसला. या दोन्ही पिशव्यांमध्ये त्यांना गांजा आढळून आला.
चार लाखांचा गांजा जप्त
सासूच्या डोक्यावर असणाऱ्या गांजाच्या पिशवीत 10 किलो 245 ग्राम गांजा सापडला. तर सुनेच्या डोक्यावर असणाऱ्या पिशवीत 10 किलो 365 ग्रॅम गांजा सापडला. एकूण 20 किलो असणाऱ्या या गांजाची किंमत चार लाख 12 हजार रुपये इतकी होती. विक्रीसाठी बेकायदेशीररित्या गांजा जवळ बाळगल्याप्रकरणी या दोन्ही सासा सुनाविरोधात लोणी काळभोर पोलीस ठाण्यात गुन्हा दाखल करण्यात आला आहे. पोलीस उपनिरीक्षक धायगुडे या प्रकरणाचा आता अधिक तपास करत आहे.
