प्रतापगढ : मनोरंजनासाठी लोक लुडो आणि पत्ते खेळताना तुम्ही अनेकदा पाहिले असतील. लुडोच्या गेममध्ये अनेक वेळा लोक पैसे लावतात. पत्त्यांमध्येही असेच एक प्रकरण दिसते. असाच एक अजब प्रकार उत्तर प्रदेशातील प्रतापगडमध्ये समोर आला आहे. जिथे एक महिला अशा प्रकारे लुडो खेळण्यात मग्न झाली की तीनं स्वत:ला पणाला लावून हरली.
कोणत्याही गोष्टीचे व्यसन वाईट असते असे म्हणतात. असाच काहीसा प्रकार प्रतापगड येथील एका महिलेसोबत घडला असून, जुगार खेळण्याचे व्यसन तिला महागात पडले आहे. महिलेला लुडो खेळण्याचे प्रचंड व्यसन होते. पती कामानिमित्त राजस्थान येथे राहत असून, तो मेहनत करुन पत्नीला पैसे पाठवयाचा. मात्र, त्याची पत्नी तेच पैसे जुगारात लावायची. महिलेचे व्यसन इतके वाढले की तिने पैसे नसताना स्वतःला पणाला लावले आणि हरवून बसले. या प्रकारानंतर महिलेनं रडत रडत पतीला संपूर्ण माहिती सांगितल्यावर त्याच्या पायाखालची जमीनच सरकली.
घरी आल्यास कुऱ्हाडीने कापण्याची धमकी
ही महिला प्रतापगड परिसरात भाड्याच्या खोलीत राहते. महिलेचा नवरा राजस्थानमध्ये काम करतो. नवऱ्याच्या म्हणण्यानुसार तो पत्नीच्या खात्यावर पैसे पाठवतो. एके दिवशी त्याने फोनवर घरी येण्याची इच्छा व्यक्त केली तेव्हा महिलेने त्याला सांगितले की, ती घरमालकाशी लुडो खेळताना स्वत:ला हरवून बसली आहे. तुम्ही जर इथे आलात तर तुम्हाला कुऱ्हाडीने कापून फेकून देण्यात येईन. पतीने सांगितल्यानुसार, त्याने याबाबत भगवा जकात नाका पोलिसांकडे तक्रार केली होती. पोलिसांनी या प्रकरणाची चौकशी करून कारवाई करण्याचे सांगितले होते, मात्र अद्याप काहीही झाले नाही.
पत्नी जुगार खेळण्याची शौकीन
महिलेच्या पतीच्या म्हणण्यानुसार तिला दोन लहान मुले आहेत. त्याचबरोबर घरमालकाला देखील दोन मुले आहेत. पत्नी जुगार खेळण्याची शौकीन असल्याचे पतीचे म्हणणे आहे. यासंदर्भात सीओ सिटी सुबोध गौतम यांचे म्हणणे आहे की, तक्रार अद्याप नोंदल्या गेलेली नाही. तक्रार प्राप्त झाल्यानंतरच या प्रकरणाची चौकशी करून कायदेशीर कारवाई केली जाईल.
