जळगाव : जळगाव जिल्ह्यात तरुणीवर झालेल्या अत्याचाराची धक्कादायक घटना समोर आलीय. पाचोरा तालुक्यात एक गतिमंद तरुणीवर अत्याचार झाला आहे. अत्याचारातून तरुणी अडीच महिन्यांची गर्भवती राहिल्याची धक्कादायक प्रकार समोर आला आहे. याबाबत संशयित नराधमाला बेड्या ठोकल्या असून त्याच्याविरुद्ध पाचोरा पोलीस ठाण्यात ॲट्रॉसिटीसह बलात्काराचा गुन्हा दाखल करण्यात आला आहे.
काय आहे घटना?
पाचोरा तालुक्यातील एका गावात राहणाऱ्या २२ वर्षीय गतिमंद तरुणीवर गावातच राहणाऱ्या २२ वर्षीय तरुणाने अत्याचार केल्या असल्याचा गुन्हा दाखल करण्यात आला आहे. मागील काही महिन्यापासून मध्यरात्री पीडीतेची आई झोपलेली असताना पीडितेवर हा नराधम अत्याचार करायचा. दोन महिन्यांपूर्वी पिढीतेच्या नातेवाईकांनी ज्योतीराम पाटील याला दुष्कृत्य करताना रंगेहात पकडले होते.
गावातील प्रतिष्ठित नागरिकांनी त्याला याबाबत समजही दिली होती. त्यानंतर एके दिवशी पीडित तरुणी व तिची आई या दोघीही आजारी पडल्या. या दोघांना ग्रामीण रुग्णालयात दाखल करण्यात आले. यावेळी वैद्यकीय अधिकाऱ्यांनी तपासणी करताना पीडित तरुणी ही अडीच महिन्यांची गर्भवती असल्याचे सांगितले.
यासंदर्भात पीडित तरुणीच्या नातेवाईकांनी गावातील पंचायत समोर घटना कथन केल्यानंतर संशयित आरोपी तरुणाला पीडिते सोबत लग्न करण्याचा प्रस्ताव ठेवण्यात आला. परंतु त्याने प्रस्ताव नाकारल्यामुळे अखेर पीडित मुलीच्या आईने पाचोरा पोलीस ठाण्यात धाव घेत गुन्हा दाखल केला. त्यानंतर संशयित आरोपी ज्योतिराम पाटील यांच्या विरोधात ॲट्रॉसिटी सह बलात्काराचा गुन्हा दाखल करण्यात आला आहे. पुढील तपास पोलीस निरीक्षक किसन नजनराव पाटील यांच्या मार्गदर्शनाखाली उपअधीक्षक भरत काकडे हे करीत आहेत
