यावल : तालुक्यातील वाघोदा येथील एका 35 वर्षीय तरुणाने पाटचारी परीसरात गळफास घेत आत्महत्या केली. जगदीश हिरामण पाटील (35) असे मयत तरुणाचे नाव आहे. त्याने मृत्युपूर्वी सुसाईड नोट लिहून ठेवली आहे.
पाटचारीजवळ घेतला गळफास
यावल तालुक्यातील वाघोदा येथील जगदीश हिरामण पाटील या तरुणाने सकाळी शेती कामाला जात असल्याचे सांगत घर सोडले. जगदीश हा सायंकाळ होवून घरी न आल्याने कुटुंबाच्या वतीने शोधाशोध केल्यानंतर साकळी शेती शिवारातून मार्गस्थ होणार्‍या पाटचारीजवळ जगदीश पाटील हा झाडाला गळफास घेऊन मृतावस्थेत आढळून आला. घटनेची माहिती पोलिसांना देण्यात आली. मृतदेह येथील ग्रामीण रुग्णालयात आणण्यात आला.
आयुष्याला कंटाळून उचलले टोकाचे पाऊल
यावेळी पोलीस पाटील अशोक पाटील, वाघोदाचे माजी पोलीस पाटील प्रकाश पाटील, ग्रामपंचायतीचे माजी सदस्य प्रभाकर पाटील, जळगावचे मधुकर पाटीलसह मयताचे नातेवाईक पोलिस ठाण्यात दाखल झाले. मयताने आत्महत्येपूर्वी सुसाईड नोट लिहिली असून वैयक्तिक आयुष्याला कंटाळून आत्महत्या करीत असल्याचे त्यात नमूद केले आहे शिवाय माझ्या आत्महत्येत कोणाचाही काहीही संबंध नाही, असा उल्लेखही केला आहे. तरुणाच्या आत्महत्येमुळे गावातून हळहळ व्यक्त करण्यात आली.
