औरंगाबाद – एका चार वर्षीय चिमुकलीला खाऊ देण्याचे आमिष दाखवून तिला घराच्या गच्चीवर नेऊन दोन अल्पवयीन मुलांनी अत्याचार केल्याची धक्कादायक घटना दोन दिवसांपूर्वी वाळूज उद्योगनगरातील बजाजनगरात घडली. याप्रकरणी चिमुकलीच्या आईच्या फिर्यादीवरून दोन अल्पवयीन मुलांविरुद्ध एमायडीसीवाळूज ठाण्यात गुन्हा दाखल करण्यात आला आहे.
शेजारील एक 13 वर्षीय व दुसर्‍या 10 वर्षीय मुलाने चिमुकली खाऊ देत आपण गच्चीवर जाऊन खाऊ असे म्हणून गच्चीवर नेले. तेथे दोघांनी तिच्यावर अत्याचार केला. अचानक घडलेल्या या प्रकारामुळे घाबरलेल्या चिमुकलीने रडत आईकडे जाऊन आपबिती कथन केली. तिच्या आईला धक्का बसला. रात्री पती घरी आल्यानंतर आपल्या चिमुकलीवर शेजारील दोघांनी अत्याचार केल्याचे सांगितले. रात्री मुलीवर घरच्या घरी उपचार केल्यानंतर घाबरलेल्या तिच्या पालकांनी तक्रार केली नाही. दुसऱ्या दिवशी चिमुकली घेऊन पालक खाजगी रुग्णालयात गेले. डॉक्टरांनी पोलीस ठाण्यात तक्रार देण्याचा सल्ला दिला.
चिमुकलीच्या आईने रविवारी सकाळी सामाजिक कार्यकर्त्यांना याची माहिती दिली. त्यांनी चिमुकलीच्या पालकांना एमआयडीसी वाळूज पोलिस ठाण्यात आणले. घटनेचे गांभीर्य लक्षात घेऊन पोलिस उपायुक्‍त उज्वला वनकर, सहाय्यक पोलीस आयुक्त विवेक सराफ, पोलीस निरीक्षक संदीप गुरमे यांनी माहिती जाणून घेतली व विधिसंघर्षग्रस्त मुलांविरुद्ध गुन्हा दाखल केला.
