जळगाव : कार शिकत असताना कार तलावात जाऊन एकाच मृत्यू झाला तर दुसरा बचावल्याची घटना रविवारी सायंकाळी घडली. जावेद अलियार खाॅ पठाण असे मृत कर्मचाऱ्याचे नाव आहे. ते गेल्या २० वर्षांपासून जैन कंपनीत फिटर पदावर कायमस्वरूपी नोकरीत होते. हा घातपात असल्याचा संशय त्याच्या कुटुंबीयांनी व्यक्त केला असून हा अपघात असल्याचे कंपनीकडून सांगण्यात आले.
काय आहे घटना?
काल रविवारी सायंकाळी जैन इरिगेशन कंपनीत फिटर पदावर काम करणारे जावेद अलियार खाॅ पठाण हे कैलास राठोड याच्यासह कंपनीची चारचाकी कार शिकत होते. यावेळी सुमारे दोन-तीन किलाेमीटर अंतर कापल्यानंतर घाटात ब्रेकऐवजी त्यांनी एक्सलेटर दाबले. यामुळे चारचाकी वेगाने घाटातून पुढे जाऊन तलावात कोसळली. या वेळी कैलास राठोड कसेबसे बचावले; पण जावेद यांचा पाण्यात बुडून मृत्यू झाला. त्यांचा मृतदेह सायंकाळी साडेसात वाजता शासकीय वैद्यकीय महाविद्यालयात दाखल केला.
दरम्यान, जावेद यांचा गेल्या सहा महिन्यांपासून पगार झालेला नव्हता. ते पगारासाठी तगादा लावत होते. त्यामुळे त्यांचा घातपात असल्याचा आरोप त्यांच्या कुटुंबीयांनी केला आहे. या घटनेची चौकशी करून पोलिसांत गुन्हा दाखल करावा, अशी मागणी त्यांच्यासह एमआयएमचे रेहान जहागीरदार यांनी केली आहे.
