नवी दिल्ली : मणिपूर विधानसभा निवडणुकांची घोषणा होताच रक्तरंजित खेळ सुरू झाला आहे. इंफाळ जिल्ह्यात भाजपच्या कार्यकर्त्याची गोळ्या झाडून हत्या केल्याची धक्कादायक घटना समोर आली आहे. भाजप कार्यकर्त्यासह आयआरबीच्या एका जवानाचीही हत्या करण्यात आली आहे. या घटनेने परिसर हादरला आहे. या घटनेची मुख्यमंत्र्यांनी गंभीर दखल घेतली आहे.
याबाबत असे की, अबुजम जॉन (वय ५०) आणि आयआरबी जवान अबुजम शशिकांता ( वय ३४) हे त्यांच्या घराजवळ होते, तेव्हा हल्लेखोरांनी त्यांची गोळ्या झाडून हत्या केली. या घटनेतील गुन्हेगारांची ओळख अद्याप पटलेली नाही. जॉनचा जागीच मृत्यू झाला तर IRB जवान शशिकांत यांचा रुग्णालयात नेत असताना मृत्यू झाला, असं पोलिसांनी सांगितलं.
अबुजाम जॉन हा भाजपचा सदस्य होता आणि तो कृषी मंत्री ओ लुखोई यांच्यासाठी काम करत होता, असे भाजपच्या सूत्रांनी सांगितले. आयआरबी जवान शशिकांता हे देखील भाजप समर्थक होते आणि त्या परिसरात पक्षाचे काम करत होते, असे काही स्थानिकांनी सांगितले. मुख्यमंत्री एन. बिरेन सिंह यांनी सोमवारी सकाळी पीडितांच्या कुटुंबीयांची भेट घेतली.
