वरणगाव प्रतिनिधी | घरगुती गॅससिलिंडरला अचानक आग लागल्याने वरणगाव फॅक्टरी येथे दोन जण जखमी झाल्याची घटना २८ ऑक्टोबर रोजी घडली. त्याबाबत येथील पाेलिसांत गुरुवारी नोंद करण्यात आली.
वरणगाव फॅक्टरी वसाहतीत क्वाॅर्टर क्रमांक १७६ मधील रहिवासी श्रीकांत आत्माराम विसाळे (वय ५७) व हेमंत श्रीकांत विसाळे हे दोघे पिता-पुत्र स्वयंपाक घरामध्ये चहा बनवत असताना अचानक गॅस गळती झाल्याने सिलिंडरने पेट घेतला. दोघांनी आग विझवण्याचा प्रयत्न केला. परंतु त्या प्रयत्नात ते दोघे भाजले. शेजाऱ्यांनीही आग विझवण्याचा प्रयत्न केला. अखेर श्याम मस्के, योगेश सूर्यवंशी अादींनी भाजलेल्या दाेघा पिता-पुत्रांना बाहेर काढले. वरणगाव फॅक्टरीच्या अग्निशमन दलाने आग आटोक्यात आणली. परंतु या आगीत श्रीकांत विसाळे ४५ टक्के तर हेमंत हा ६० टक्के भाजला आहे.
त्यांना तत्काळ बऱ्हाणपूर येथील दवाखान्यात दाखल करण्यात आले होते. परंतु प्रकृतीत सुधारणा होत नसल्याने त्यांना सध्या मुंबई येथील ऐरोली बर्न हॉस्पिटलमध्ये दाखल केले आहे . घटनास्थळी इंडियन ऑइल कंपनीचे अधिकारी ठाकरे यांनी भेट दिली आहे. उपचारासाठी माेठा खर्च लागणार असल्याचे अधिकृत सूत्रांनी सांगितले. या प्रकरणी वरणगाव पोलिसांत उशीरा नोंद करण्यात आली. तपास पोलिस कॉन्स्टेबल नरसिंग चव्हाण करत अाहेत.
