यावल प्रतिनिधी | शहरातील रहिवासी २५ वर्षीय महिलेची दुकानात लागणाऱ्या इलेक्ट्रिक व होम अलायन्सेस वस्तूंची हाेलसेल दराने खरेदीच्या नावाखाली सुमारे साडेचार लाख रुपयांमध्ये फसवणूक झाली. या प्रकरणी रेणापूर तालुक्यातील संशयिताविरुद्ध यावल पोलिसांत गुन्हा दाखल झाला.
रिमार्ट शॉपी कंपनीचे मालक विलास मोतीराम राठोड (रा.अंबाजोगाई रोड, ता.रेणापूर, जि.लातूर) यांनी ९९९ ब्रॅड बाजार या नावाने रिटेल शॉपीसाठी विविध गृहपयोगी वस्तू विक्री करण्यासाठी यावल शहरातील गवत बाजाराजवळील रहिवासी शुभांगी जुगल पाटील यांच्याशी संपर्क केला. राठोड यांच्या सांगण्यानुसार पाटील यांनी विविध साहित्याच्या खरेदीसाठी वेळोवेळी साडेचार लाख रुपये बँक खात्यात जमा केले.
मात्र, पैसे देऊनही दिलेल्या ऑर्डरनुसार त्यांना अद्याप साहित्य मिळाले नाही. याबाबत विलास राठोड यांच्याशी वारंवार संपर्क साधूनही त्यांनी उडवाउडवीची उत्तरे दिली. या प्रकरणात फसवणूक झाल्याचे शुभांगी पाटील यांच्या लक्षात आले. त्यांनी यावल पोलिसांत राठोड याच्याविरुद्ध फसवणुकीचा गुन्हा दाखल केला. तपास सहाय्यक पोलिस निरीक्षक अजमल खान पठाण करत आहे.
